ინგლისის პრემიერლიგაში მე-18-ე ტურის შეხვედრები ჩატარდა. ზედიზედ მეოთხე თამაში მოიგო "მანჩესტერ იუნაიტედმა". მოურინიოს გუნდმა ოლდ ტრაფორდზე "სანდერლენდს" 3-1 აჯობა.

მანჩესტერელები, პრაქტიკულად, მთელი შეხვედრის განმავლობაში ფლობდნენ უპირატესობას, რაც გოლში 39-ე წუთზე გარდასახეს.

ზლატან იბრაჰიმოვიჩის პასით ანგარიში დელეი ბლინდმა გახსნა. ამის შემდეგ, მთავარი მოვლენები 81-ე წუთის შემდეგ განვითარდა, როდესაც კიდევ სამი გოლი გავიდა მატჩში.

იბრაჰიმოვიჩმა ამჯერად თავად გაიტანა, ხოლო ოთხ წუთში ჰენრიკ მხითარიანს გაატანინა.

სტუმრებმა პრესტიჟის გოლი მსაჯის მიერ კომპენსირებულ დროში გაიტანეს, მისი ავტორი იტალიელი ფორვარდი ფაბიო ბორინი გახდა.

საბოლოოდ, 3-1 "იუნაიტედის" დამაჯერებელი გამარჯვება. მანჩესტერელები, ჩემპიონატში ჯერჯერობით მეექვსე ადგილზე არიან.

კვლავ შეუჩერებელია ლონდონის "ჩელსი". ანტონიო კონტეს გუნდს ზედიზედ 12 შეხვედრაში ქულაც არ დაუკარგავს.

არისტოკრატებმა გუშინ საკუთარ სტემფორდ ბრიჯზე "ბორნმუთი" მიიღეს და ანგარიშით 3-0 დაამარცხეს. თამაში, როგორც მოსალოდნელი იყო, მასპინძელთა უპირატესობით დაიწყო. პირველი გოლი 24-ე წუთზე გავიდა, სესკ ფაბრეგასის გადაცემის შემდეგ ზუსტად, პედრო როდრიგესმა დაარტყა. ტაიმი ლონდონელებმა 1-0 მოიგეს.

მეორე ნახევრის სტარტზე, ბელგიელმა ედენ აზარმა დანიშნული პენალტი გოლად გარდასახა. შეხვედრის მესამე დამატებულ წუთზე კი, სტუმართა მცველმა სტივ კუკმა ბურთი საკუთარ კარში ჩაჭრა და მატჩის საბოლოო შედეგი დაფიქსირდა, 3-0.

ლონდონური კლუბი 18 ტურის შემდეგ 46 ქულით პრემიერლიგის გათამაშებას დამაჯერებლად ლიდერობს.