ორი წლის შემდეგ პარლამენტი სადავო კანონს ხელმეორედ უბრუნდება. საუბარია ფარული მიყურადების შესახებ კანონმდებლობაზე, რომელშიც გარკვეული ცვლილებების შეტანა პარლამენტს საკონსტიტუციო სასამართლომ დაავალა.

შესაცვლელია პირადი ინფორმაციის მოპოვება-შენახვის ნორმები, რაზეც საპარლამენტო უმრავლესობა, ოპოზიცია და მესამე სექტორი ისევ ვერ თანხმდება. კვლავ სადავოა, თუ ვის ხელში უნდა იყოს ე.წ. გასაღები.

საკანონმდებლო ორგანოში შექმნილი სპეციალური ჯგუფი ახალ კანონპროექტზე მუშაობას იანვრიდან, არასამთავრობო ორგანიზაციებთან და ექსპერტებთან ერთად დაიწყებს. მანამდე კი ოპონენტები და უფლებადამცველები მმართველ გუნდს კონკრეტული მოთხოვნებით მიმართავენ.