ჟენევის საერთაშორისო მოლაპარაკებების რიგით 38-ე რაუნდის შედეგები შეაჯამა შერიგებისა და სამოქალაქო თანასწორობის სახელმწიფო მინისტრის მოადგილემ.
პეტრე კანკავა ჟენევიდან დღეს გამთენიისას დაბრუნდა. ორივე სამუშაო ჯგუფში საქართველოს ოკუპირებულ ტერიტორიებზე უსაფრთხოების, ადამიანის უფლებებისა და ჰუმანიტარული კუთხით არსებული მდგომარეობა განიხილეს. გაიმართა მოლაპარაკებები ძალის გამოუყენებლობისა და ადგილზე უსაფრთხოების საერთაშორისო მექანიზმების შექმნის თაობაზე.
ასევე დაისვა ადგილობრივი მოსახლეობისთვის გადაადგილების თავისუფლების შეზღუდვის, უკანონო დაკავებებისა და გატაცებების საკითხი.
მონაწილეებმა საქართველოდან იძულებით გადაადგილებულ პირთა და ლტოლვილთა დაბრუნების საკითხზე ისაუბრეს. თემის განხილვისას რუსეთის ფედერაციისა და საოკუპაციო რეჟიმების წარმომადგენლებმა მოლაპარაკებების დარბაზი დატოვეს.
ჟენევის საერთაშორისო მოლაპარაკებების მორიგი რაუნდი 2017 წლის 28-29 მარტს გაიმართება.