ოთხი წმინდანის ხსენების დღესთან დაკავშირებით 13 დეკემბერს სრულიად საქართველოს კათოლიკოს-პატრიარქი ილია მეორე საზეიმო წირვას მცხეთაში, სვეტიცხოვლის ტაძარში აღავლენს.

მართლმადიდებელი ეკლესია ამ დღეს ანდრია პირველწოდებულის, ვახტანგ გორგასლის, პირველი კათოლიკოს-პატრიარიქ პეტრესა და მეორე პატრიარიქის სამუელის ხსენების დღეს აღნიშნავს.

როგორც ილია მეორემ საკვირაო ქადაგებისას ბრძანა, 12 დეკემბერს 18:00 საათზე ლოცვას, ხოლო 13 დეკემბერს, 10:00 სასულიერო პირებთან ერთად საზეიმო წირვას ჩაატარებს.

ქადაგებისას პატრიარქმა მოსახლეობას მოუწოდა, საახალწლოდ ყველა ოჯახში ნაძვის ნერგი შევიდეს, რაც ილია მეორეს თქმით, ოჯახებში სიცოცხლის შესვლას ნიშნავს.

„როგორ შეიძლება ადამიანმა ახსნას რა არის სიცოცხლე? ერთ შემთხვევაში, თითქოს ცოცხალი არსება. მაგალითისთვის ავიღოთ მცენარე, შეიძლება ადამიანმა შექმნას მსგავსი თესლისა, მაგრამ ის თესლი იქნება მკვდარი, არავითარი სიცოცხლე მასში არ იქნება, მაგრამ თუ ღვთისგან ჩადებული სიცოცხლეა მასში, ის იზრდება და მრავლდება. არის ტრადიცია, რომ მცენარეები შეაქვთ სახლში, ტაძრებში, შენობებში. თუ მოჭრილია, ის მომაკვდავია, მაგრამ თუ სიცოცხლეა და ფესვის სისტემაა მასში,ის ცოცხალია და სიცოცხლე შეაქვს ადამიანის საცხოვრებელში.

იცით რომ, 10 წლის წინ გაიხსნა გამწვანების კოლეჯი, რომელიც სამების საკათედრო ტაძარში ფუნქციონირებს.

მინდა მოგიწოდოთ ყველას - უნდა ვისწავლოთ ნერგების გამოყვანა. მოდის ახალი წელი, თქვენ სურვილი გაქვთ, რომ ნამდვილი ნაძვის ხე გქონდეთ, მაგრამ ხშირ შემთხვევაში, სახლებში მკვდარი ნაძვის ხე შეგაქვთ.

სასურველია, რომ შეიტანოთ ნაძვის ნერგი“,- აღნიშნა ილია მოერემ ქადაგებისას.

როგორც პატრიარქმა ბრძანა, საქართველო ნაძვის ნერგებით მდიდარია. მისივე თქმით, ბევრ ქვეყანაში სწორედ ჩვენი ქვეყნიდან გადის ნაძვის ნერგი და სწორედ ამიტომ, ილია მეორემ მოსახლეობას მოუწოდა, შეისწავლონ ნერგების გამრავლების ტექნოლოგია.

ამის საშუალება კი პატრიარქის თქმით, ყველა მსურველს სამების საკათედრო ტაძარში არსებულ გამწვანების კოლეჯში აქვს.