იგეგმება თუ არა კრწანისში ოცი ათას კვადრატულ მეტრამდე ტერიტორიის იჯარით გაცემა, საკრებულოს ფრაქცია “ნაციონალური მოძრაობის” ბრალდებებს მერიიდან მოულოდნელი პასუხი მოჰყვა.

ოპოზიციონერებმა დღეს დილით გამართულ ბრიფინგზე დედაქალაქის მთავრობის სხდომის ოქმი წარმოადგინეს და განაცხადეს, რომ მერია კერძო კომპანიისთვის აბანოებიდან ბაგრატიონის ძეგლამდე გამწვანებული ტერიტორიის 15 წლის ვადით გადაცემას გეგმავდა და საკითხი საკრებულოს განსახილველად უახლოეს პერიოდში გადაეგზავნებოდა.

"ნაციონალური მოძრაობის" წევრების ვარაუდით, მიუხედავად იმისა რომ საინვესტიციო პირობა ტერიტორიაზე დაკიდული ბაღების განთავსებას ითვალისწინებს, კომპანიამ შესაძლოა იქ ხეების გაჩეხვის ხარჯზე სხვადასხვა ინფრასტრუქტურის მშენებლობა წამოიწყოს.

უმრავლესობამ და მერიამ პასუხად საკრებულოს პირველი ნოემბრის სხდომის კენჭისყრის ანგარიში წამოადგინა, რომელზეც საკითხი უკვე დამტკიცდა და მას მხარი სევდია უგრეხელიძემაც დაუჭირა.

მათი განმარტებით, კერძო კომპანიას იჯარით მხოლოდ 6 მეტრი ფართობი გადაეცა, სადაც ის დაკიდულ ბაღებს მოაწყობს, სანაცვლოდ კი, გორგასლის ქუჩის მიმდებარედ არსებულ სკვერში 450 ათასი ლარის ღირებულების კეთილმოწყობის სამუშაოების განხორციელების ვალდებულება ექნება.