აირაის და ენდიაის სადამკვირვებლო მისიის წარმომადგენლები არჩევნებამდე ორი დღით ადრე პრეზიდენტს შეხვდნენ და ქვეყანაში არსებულ წინასაარჩევნო გარემოზე ესაუბრნენ. პრეზიდენტის მრჩევლის ფიქრია ჩიხრაძის თქმით, საარჩევნო პროცესში დამკვირვებლების ჩართულობა მნიშვნელოვანია. მან არჩევნების მშვიდ ვითარებაში ჩატარებაზე ხელისუფლების პასუხისგმებლობაზეც გაამახვილა ყურადღება.
პრეზიდენტამდე სადამკვირვებლო მისიის წევრები პარლამენტის თავმჯდომარესაც შეხვდნენ. მათ ქვეყანაში არსებულ წინასაარჩევნო გარემოსა და გამოწვევებზე ისაუბრეს. დავით უსუფაშვილის თქმით, 2012 წლის არჩევნებთან შედარებით ვითარება გაუმჯობესებულია, თუმცა ბოლო დროს მომხდარი ძალადობრივი ქმედებები მშვიდ საარჩევნო გარემოს საფრთხეს უქმნის. მან ასევე იმედი გამოთქვა, რომ რვა ოქტომბერს საქართველოში მრავალრიცხოვანი სადამკვირვებლო მისიების ყოფნა არჩევნების სტაბილურ ვითარებაში ჩატარებას ხელს შეუწყობს.