მცხეთა-სტეფანწმინდა-ლარსის საავტომობილო გზის გუდაური-კობის მონაკვეთი გაიხსნა. აღნიშნულ მონაკვეთზე ავტოტრანსპორტის გადაადგილება თავისუფლადაა შესაძლებელი. კობიდან თბილისის მიმართულებით მოძრავი პირველი ავტოკოლონა საქართველოს რეგიონული განვითარებისა და ინფრასტრუქტურის მინისტრმა დავით შავლიაშვილმა, ინფრასტრუქტურის მინისტრის პირველმა მოადგილემ გიორგი ამაშუკელმა, საავტომობილო გზების დეპარტამენტის თავმჯდომარემ ვაჟა ფანჩულიძემ და სახელმწიფო უსაფრთხოებისა და კრიზისების მართვის საბჭოს მდივნის მოადგილემ გიორგი ზედელაშვილმა პირადად გამოაცილეს. მისაბელიანი და ნახევრადმისამბელიანი ტრანსპორტისთვის კი მოძრაობა უახლოეს საათებში აღდგება. რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტმა გუდაურიდან კობამდე გზის გაწმენდითი სამუშაოები მთლიანად დაასრულა. პარალელურ რეჟიმში, აღნიშნული მონაკვეთის გაფართოებაც მოხდა, რათა სატრანსპორტო საშუალებებს უსაფრთხო გადაადგილების შესაძლებლობა ჰქონოდათ.