■ „ინფო 9“-სა და მისი მკითხველის ერთობლივი ძალისხმევით, ნათიასა და მისი შვილების ყველაზე სანუკვარი ოცნება ახდა.
ახალ წელს ნათია ბენიაშვილი შვილებთან ერთად სულ სხვა განწყობით და სხვა გარემოში ხვდება.
„ინფო 9“-ზე გასულ სიუჟეტს დიდი გამოხმაურება მოჰყვა. ნათიას გასაჭირი გულთან უამრავმა ადამიანმა მიიტანა და მას დახმარება აღმოუჩინა. უკვე დაფარულია მისი ბანკის ვალი. თბილისის მერიამ კი ახალი წლის წინა დღეს მისი და მისი შვილების ყველაზე დიდი ოცნება აასრულა.
თბილისის მერის დავით ნარმანიას თქმით, ბენიაშვილების ოჯახს საცხოვრებელი ბინის ქირით ნაძალადევის რაიონის გამგეობა იმ დრომდე უზრუნველყოფს, ვიდრე ეს საჭირო იქნება.
„ჩვენ იმაზეც ვიზრუნეთ, რომ მერიის ქვემდებარე ერთ-ერთ უწყებაში ამ ქალბატონს ჰქონდეს სტაბილური სამუშაო ადგილი.
ეს არის მინიმალური, რისი გაკეთებაც ჩვენ შევძელით ამ ოჯახისთვის. ყველაფერს გავაკეთებთ, რომ მაქსიმალურად უკეთესი პირობები შევუქმნათ ადამიანებს, რათა ისინი უზრუნველყოფილი იყვნენ სამუშაო ადგილებით და თავად შეძლონ საკუთარი ოჯახის რჩენა“, - განაცხადა დავით ნარმანიამ.
ავტორები: ეკა მელიქიძე, ნინო ჭანია, ელენე ცინცაძე, გიორგი ხაჩიძე