myvideo-ს სახელით, „მომხმარებელს“ მაუწყებლობის ტრანზიტის უფასო მომსახურებას უწევს შპს „პრემიუმ ვებ სოლუშენს“ (საიდენტიფიკაციო კოდი 404503042, იურიდიული მისამართი: ქ. თბილისი, დ. თორაძის ქუჩა, N9) (შემდგომში: „კომპანია“ ან mvideo), რომელიც წარმოადგენს საქართველოს კანონმდებლობის შესაბამისად მაუწყებლობის ტრანზიტის მომსახურებაზე ავტორიზებულ პირს.

წინამდებარე წესები (შემდგომში: „წესები“) ადგენს, „მომხმარებლის“ მიერ მაუწყებლობის ტრანზიტით უფასო მომსახურებით სარგებლობის წესებს.

წინამდებარე „წესები“ მოქმედებს განუსაზღვრელი ვადით და „მომხმარებელზე“ ვრცელდება myvideo-ს მაუწყებლობის ტრანზიტით უფასო მომსახურების ფაქტობრივად გამოყენების მომენტიდან.

ტერმინთა განმარტება

„წესებში“ გამოყენებულ ტერმინებს აქვს „ელექტრონული კომუნიკაციების სფეროში მომსახურების მიწოდების წესებისა და მომხმარებელთა უფლებების დაცვის შესახებ“ რეგლამენტითა და ამ მუხლით განსაზღვრული შემდეგი მნიშვნელობა:

• „მაუწყებლობის ტრანზიტის მომსახურება“ - ავტორიზებადი საქმიანობა, რომელიც მოიცავს „კომპანიის“ მიერ მაუწყებლისაგან კანონიერ საფუძველზე მიღებული ტელე ან რადიოარხის უცვლელი სახით (ტელე ან რადიოპროგრამებში სარედაქციო ცვლილებების შეტანის გარეშე) გადაცემას და ბოლო მომხმარებლისათვის მიწოდებას საერთო სარგებლობის ელექტრონული საკომუნიკაციო ქსელებისა და საშუალებების გამოყენებით.

• „მომხმარებელი“ – 18 წელს მიღწეული ბოლო მომხმარებელი ფიზიკური პირი, რომელსაც საფასურის გადახდის გარეშე, საკუთარი მოხმარებისთვის, myvideo-ს საშუალებით მიეწოდება მაუწყებლობის ტრანზიტის მომსახურება და რომელიც მიზნად არ ისახავს მიწოდებული მომსახურებ(ებ)ის შემდგომ მიყიდვას სხვა მომხმარებელზე;

• „კანონმდებლობა“ – საქართველოს მოქმედი საკანონმდებლო და კანონქვემდებარე ნორმატიული აქტები;

• „კომისია“ – სსიპ საქართველოს კომუნიკაციების ეროვნული კომისია- www.comcom.ge

• „მესამე პირი“ – ნებისმიერი პირი გარდა „მომხმარებლისა“ ან/და „სილქნეტისა“.

• „მომხმარებელთა ინტერესების საზოგადოებრივი დამცველი“ - სსიპ საქართველოს კომუნიკაციების ეროვნულ კომისიასთან მოქმედი ელექტრონული კომუნიკაციებისა და მაუწყებლობის სფეროების მომხმარებელთა ინტერესების საზოგადოებრივი დამცველი (ომბუდსმენი) - https://momkhmarebeli.comcom.ge/ ;

• „რეგლამენტი“ – „ელექტრონული კომუნიკაციების სფეროში მომსახურების მიწოდებისა და მომხმარებელთა უფლებების დაცვის შესახებ რეგლამენტი“;

• „სამუშაო დღე“ – დღე, შაბათის, კვირის, ასევე „კანონმდებლობით“ განსაზღვრული უქმე დღეების გარდა;

• „ფროდი“ - მაუწყებლობის ტრანზიტის უფასო მომსახურების „წესების“ პირობების დარღვევით მიღება;

მომსახურებით სარგებლობის პირობები და უფლება-ვალდებულებები

Myvideo-ს მაუწყებლობის ტრანზიტის უფასო მომსახურების მისაღებად, აუცილებელია “მომხმარებელი” სარგებლობდეს სტაბილური ინტერნეტ მომსახურებით- სიჩქარე მინიმუმ 3 მეგაბიტი წამში.

„მომხმარებელს“ ეძლევა საშუალება როგორც myvideo-ზე რეგისტრაციით, ასევე რეგისტრაცია/ავტორიზაციის გარეშე ისარგებლოს myvideo-ის მაუწყებლობის ტრანზიტის უფასო მომსახურებით (შემდგომში ასევე „მომსახურება“) .

“მომხმარებელი” ვალდებულია:

• მხოლოდ საკუთარი მოხმარებისათვის გამოიყენოს myvideo-ს მიერ მიწოდებული „მომსახურება“ და არ დაუშვას მიღებული მომსახურებ(ებ)ის შემდგომი გადაყიდვა პირდაპირი ან ირიბი ფორმით (მაგალითად, აბონენტების აყვანა ან სხვ.)/ ან ნებისმიერი სხვა ფორმით გადაცემა მესამე პირზე;

• მომსახურებით სარგებლობისას, არ დაუშვას myvideo-სთვის/”მესამე პირებისათვის” ზიანის მიყენება, მომსახურების მიწოდების ხელშეშლა ან მომსახურების გამოყენება ფროდის მიზნებისათვის.

“მომხმარებელი” უფლებამოსილია:

• მომსახურების მიღების შეფერხების/წყვეტის შემთხვევაში, მიმართოს myvideo-ს (წერილობითი ფორმით ელექტრონული ფოსტის მისამართზე [email protected] ან ზეპირი განაცხადით - სატელეფონო ნომერზე - 0322 490049) და მიიღოს ინფორმაცია არის თუ არა დაზიანება myvideo-ს მხარეს, ასევე მიიღოს ინფორმაცია ხარვეზის/დაზიანების აღმოფხვრის სავარაუდო ვადების თაობაზე თუ ამგვარი ხარვეზი/დაზიანება „კომპანიის“ მხარესაა.

myvideo უფლებამოსილია:

• მოსთხოვოს „მომხმარებელს“ ამ „წესებით“ გათვალისწინებული პირობების ჯეროვნად და კეთილსინდისიერად შესრულება,

• ცალმხრივად და საკუთარი ინიციატივით შეწყვიტოს მაუწყებლობის ტრანზიტის უფასო მომსახურების მიწოდება, ასევე ცალმხრივად (სხვა დანარჩენი პირობების შეცვლით ან უცვლელად) შეცვალოს (დაამატოს, გათიშოს ან ჩაანაცვლოს) არხები რომელთა უფასო ტრანზიტიც ხორციელდება myvideo-ს მიერ.

myvideo ვალდებულია:

• უზრუნველყოს მაუწყებლობის ტრანზიტის უფასო მომსახურების მიწოდება ავტორიზაციით განსაზღვრული პირობების და ამ წესების შესაბამისად;

• უზრუნველყოს „მომხმარებლისთვის“ მაუწყებლობის ტრანზიტის უფასო მომსახურების შესახებ ინფორმაციის ხელმისაწვდომობა, მათ შორის, უფლებებისა და ვალდებულებების შესახებ, აგრეთვე “რეგლამენტით” განსაზღვრული სხვა ინფორმაციის მიწოდება;

• კეთილსინდისიერად და ჯეროვნად შეასრულოს წინამდებარე წესებით გათვალისწინებული სხვა ვალდებულებები.

მომსახურების ხარისხი, დაზიანების აღმოფხვრა და საჩივრები / საპრეტენზიო განაცხადები

myvideo-ს მომსახურების ხარისხი დამოკიდებულია „მომხმარებლის “ინტერნეტ მომსახურების სიჩქარესა და ხარისხზე.

ინტერნეტ მომსახურების ხარისხთან დაკავშირებით ნებისმიერი სახის პრეტენზიის შემთხვევაში, “მომხმარებელმა” უნდა მიმართოს იმ ინტერნეტ პროვაიდერს, რომლის მომსახურებითაც სარგებლობს.

ასევე, კომპანია არ არის პასუხისმგებელი „მომსახურების“ ხარისხზე, თუ ხარისხის პრობლემები გამოწვეულია პროგრამული ვირუსით ან თუ „მომსახურების“ ხარისხის გაუარესებას იწვევს „მომხმარებლის“ კუთვნილი ან მისთვის “მესამე პირის” მიერ დროებით სარგებლობაში გადაცემული სატელეკომუნიკაციო ტერმინალური მოწყობილობა.

დაზიანება არის myvideo-ს მაუწყებლობის ტრანზიტის უფასო მომსახურების მიწოდების შეფერხება/შეწყვეტის ყოველი ფაქტი, რომელიც კომპანიის მხარესაა, დადასტურებულია კომპანიის მიერ და რომელიც ზღუდავს „მომხმარებლის“ მიერ მომსახურების მიღებას.

დაზიანების აღმოფხვრა ხორციელდება “რეგლამენტით” განსაზღვრულ ვადებში;

დაზიანებ(ებ)ის აღმოფხვრის ვად(ებ)ის გადაცილებად არ ჩაითვლება და ვადის დინება ჩერდება შემდეგ საპატიო შემთხვევებში:

• სამუშაოების წარმოება ფერხდება, ჭიანურდება myvideo-სგან დამოუკიდებელი მიზეზით. ამ შემთხვევაში, ვადის დინება ჩერდება შემაფერხებელი მიზეზების აღმოფხვრამდე პერიოდით;

• კიბერშეტევა/ჰაკერული თავდასხმა;

• წინამდებარე „წესებით“ განსაზღვრული სხვა საფუძვლებით, მათ შორის, ფორსმაჟორული გარემოებების გამო მომსახურებ(ებ)ის შეზღუდვა/შეწყვეტა;

„მომხმარებელი“ უფლებამოსილია პრეტენზია/საჩივრით მიმართოს „კომპანიას“.

„მომხმარებლის” საჩივრის წარდგენის მომენტიდან myvideo-ს შესაბამისი სტრუქტურული ერთეული იწყებს საჩივრის განხილვის წარმოებას, „საჩივრების წარდენისა და განხილვის წესების“ შესაბამისად, რომელიც ხელმისაწვდომია myvideo-ს ვებგვერდზე - www.myvideo.ge.

მიღებული გადაწყვეტილება შეიძლება გასაჩივრდეს “კომისიაში”, “კომისიასთან” მოქმედ “მომხმარებელთა ინტერესების საზოგადოებრივი დამცველის” სამსახურში ან სასამართლოში.

“მხარეთა” პასუხისმგებლობა,

„მხარეები“ პასუხისმგებელნი არიან წინამდებარე „წესებით“ განსაზღვრული ვალდებულებების ჯეროვნად და კეთილსინდისიერად შესრულებაზე;

myvideo არ არის პასუხისმგებელი „მომხმარებლის“ ბრალეულობით “მესამე პირისათვის” მიყენებულ ზარალზე/ზიანზე.

myvideo უფლებამოსილია „მომხმარებლისგან“ მოითხოვოს ზიანის (ზარალის) ანაზღაურება, თუ იგი გამოწვეულია უშუალოდ „მომხმარებლის“ ქმედებით.

წინამდებარე „წესების“ 2.3.1. პუნქტით განსაზღვრული ვალდებულების დარღვევის, კერძოდ, „მომსახურების“ შემდგომი გადაყიდვის შემთხვევაში myvideo უფლებამოსილია დააკისროს „მომხმარებელს“ ჯარიმა 5,000.00 (ხუთი ათასი) ლარამდე ოდენობით და მოითხოვოს მისთვის მიყენებული ზიანის/ზარალის ანაზღაურება.

კონფიდენციალურობა და პერსონალურ მონაცემთა დაცვა

myvideo „მომხმარებლის “პერსონალური მონაცემების დამუშავებას ახორციელებს წინამდებარე „წესების“, „კონფიდენციალურობის პოლიტიკის“, “რეგლამენტისა” და „პერსონალურ მონაცემთა დაცვის შესახებ“ საქართველოს კანონის საფუძველზე;

კომპანიის „კონფიდენციალურობის პოლიტიკა“ ხელმისაწვდომია myvideo-ს ვებ-გვერდზე.

თითოეული მხარე ვალდებულია დაიცვას მეორე მხარისაგან მიღებული ნებისმიერი სახის ინფორმაციის კონფიდენციალობა, გარდა წინამდებარე თავით განსაზღვრული და საქართველოს კანონმდებლობით გათვალისიწინებული გამონაკლისი შემთხვევებისა;

კონფიდენციალობის დაცვის ვალდებულება არ ვრცელდება ინფორმაციაზე:

• რომელიც საქართველოს კანონმდებლობის შესაბამისად ცნობილი იყო ინფორმაციის მიმღები მხარისათვის მეორე მხარის მიერ შესაბამისი ინფორმაციის მიწოდებამდე;

• რომლის გამჟღავნებაც ხდება საქართველოს კანონმდებლობის მოთხოვნათა შესაბამისად და შესასრულებლად;

• რომლის მოპოვებაც შესაძლებელია სხვა, მათ შორის, საჯაროდ ხელმისაწვდომი წყაროებიდან;

• რომელიც არის ან გახდება მესამე პირისათვის ხელმისაწვდომი “მხარეთა” წერილობითი შეთანხმებით, მათ შორის, წინამდებარე თავის საფუძველზე;

• რომლის გადაცემის ვალდებულებაც myvideo-ს აქვს უფლებამოსილი ორგანოს (“კომისია”, სასამართლო და სხვ.) მომართვის შემთხვევაში, საქართველოს კანონმდებლობით დადგენილი შესაბამისი საფუძვლის არსებობისას.

კომუნიკაცია „მხარეთა“ შორის

მაუწყებლობის ტრანზიტის უფასო მომსახურებასთან დაკავშირებით „მომხმარებელთან“ კომუნიკაცია ხორციელდება საჯაროდ ან ინდივიდუალურად.

საჯარო კომუნიკაცია ხორციელდება myvideo-ს ვებ-გვერდზე საჯარო ინფორმაციის (განცხადების) განთავსებით, და/ან მასობრივი ინფორმაციის საშუალებების (მათ შორის, სოციალური ქსელების) გამოყენებით.

„მომხმარებელთან“ ინდივიდუალური კომუნიკაცია ხორციელდება „კანონმდებლობით“, მათ შრის „რეგლამენტით“ გათვალისწინებულ შემთხვევებსა და წესით.

მომხმარებელთან, რომელიც არ არის რეგისტრირებული myvideo-ს ვებ-გვერდზე და რომელის საკონტაქტო ინფორმაცია კომპანიისთვის ცნობილი არ არის კომუნიკაცია და ინფორმაციის მიწოდება ხორციელდება მხოლოდ საჯაროდ, myvideo-ს ვებ-გვერდზე საჯარო ინფორმაციის (განცხადების) განთავსებით.

შეტყობინების ვებ-გვერდზე გამოქვეყნების ან მასობრივი ინფორმაციის საშუალებებით საჯაროდ გავრცელების შემთხვევაში, შეტყობინება გამოქვეყნებულად/გავრცელებულად ჩაითვლება გამოქვეყნების ან/და გავრცელების თარიღიდან.

მაუწყებლობის ტრანზიტის უფასო მომსახურებასთან დაკავშირებით, „მომხმარებლის“ მიერ myvideo-სთან კომუნიკაცია ხორციელდება სატელეფონო ნომერზე: 0322 490049 დარეკვით ან ელ.

ფოსტის მისამართზე წერილობითი შეტყობინების გაგზავნით.

ცვლილებების და დამატებების შეტანის წესი

წინამდებარე „წესებში“ ცვლილებებისა და დამატებების შეტანა ხორციელდება myvideo-ს ინციატივით, რომელიც უფლებამოსილია, ნებისმიერ დროს, საკუთარი შეხედულებისამებრ, „მომხმარებლის“ დამატებითი წინასწარი თანხმობისა თუ აქცეპტის გარეშე, ცალმხრივად, შეიტანოს ცვლილებები და დამატებები წინამდებარე „წესებში“, რომლის შესახებ ინფორმაცია პროაქტიულად გამოქვეყნდება კომპანიის ვებ-გვერდზე.

ფორს-მაჟორი

„მხარეები“ თავისუფლდებიან პასუხისმგებლობისაგან მათ მიერ ნაკისრი ვალდებულებების სრული ან ნაწილობრივი შეუსრულებლობისათვის დაუძლეველი ძალის მოქმედების შემთხვევაში, რომლის დროსაც შეუძლებელია ვალდებულებების შესრულება;

დაუძლეველი ძალის გარემოებებს მიეკუთვნება სტიქიური უბედურებები (წყალდიდობა, მიწისძვრა, ხანძარი და სხვა) აფეთქებები (მათ შორის ტერორისტული თუ დივერსიული აქტები), საომარი მოქმედებები (მათ შორის სამოქალაქო არეულობები და გაფიცვები), ხელისუფლების ისეთი აქტები, რაც არსებითად აფერხებს „მხარეთა“ მიერ ნაკისრი ვალდებულებების შესრულებას, ეპიდემია, პანდემია და სხვ.;

თუ ზემოხსენებულმა გარემოებებმა უშუალოდ იმოქმედეს ნაკისრი ვალდებულებების შესრულების ვადებზე, მაშინ ეს ვადები ამ გარემოებების მოქმედების დროს თანაბარზომიერად გაიზრდება.

მაუწყებლობის ტრანზიტის ფასიანი მომსახურება

myvideo-ს ვებ-გვერდზე, “მომხმარებლისთვის” ხელმისაწვდომია მაუწყებლობის ტრანზიტის ფასიანი მომსახურება. აღნიშნულ მომსახურებას “მომხმარებელს” სთავაზობს სს “სილქნეტი” (საიდენტიფიკაციო კოდი: 204566978, მისამართი: თბილისი, მ. წინამძღვრიშვილის ქ.N95 www.silknet.com).

აღნიშნული მომსახურების მიღებისათვის მომხმარებელი ვალდებულია გაიაროს რეგისტრაცია და შექმნას მომხმარებლის ანგარიში.

მომხმარებლის ანგარიშის საშუალებით “მომხმარებელი” შეძლებს შეიძინოს მაუწყებლობის ტრანზიტის ფასიანი მომსახურება სს „სილქნეტისაგან“, რომელის პირობებიც რეგულირდება სს “სილქნეტსა” და „მომხმარებელს“ შორის დადებული “მაუწყებლობის ტრანზიტით მომსახურების სააბონენტო ხელშეკრულებით”.

myvideo-ს ვებ-გვერდის საშუალებით “მომხმარებელს” შეუძლია შეიძინოს MYVIDEO TV BOX-ის მოწყობილობა.

MYVIDEO TV BOX არის მოწყობილობა, რომლის მეშვეობითაც „მომხმარებელს“ შეუძლია მოწყობილობის ტელევიზორთან დაკავშირების შემთხვევაში მიიღოს მაუწყებლობის ტრანზიტის უფასო და ფასიანი მომსახურება., MYVIDEO TV BOX-ის მოწყობილობის შესაძენის მოთხოვნით “მომხმარებელი” უნდა დაუკავშირდეს myvideo-ს შემდეგ სატელეფონო ნომერზე: 0322 490049. MYVIDEO TV BOX-ის შეძენის მიზნით შესაბამისი ხელშეკრულება ფორმდება myvideo-ს და “მომხმარებელს” შორის.

MYVIDEO TV BOX-ის საშუალებით მიღებულ მაუწყებლობის ტრანზიტის უფასო მომსახურებაზე ვრცელდება წინამდებარე „წესები“;

MYVIDEO TV BOX-ის საშუალებით მაუწყებლობის ტრანზიტის ფასიანი მომსახურების მიწოდებას ახორციელებს სს “სილქნეტი” (საიდენტიფიკაციო კოდი: 204566978, მისამართი: თბილისი, მ. წინამძღვრიშვილის ქ.N95 www.silknet.com) რომელის პირობებიც რეგულირდება სს “სილქნეტსა” და „მომხმარებელს“ შორის დადებული “მაუწყებლობის ტრანზიტით მომსახურების სააბონენტო ხელშეკრულებით”.