ტურიზმი და მისგან მიღებული შემოსავლები ზაფხულის ბოლო დღეს განსაკუთრებით აქტუალურია, ამიტომ ეთერს ზაფხულის მაჩვენებლებზე საუბრით ვაგრძელებთ. ევროკავშირის ქვეყნებიდან საქართველოში ამდენი მოგზაური არასოდეს ჩამოსულა - ამის შესახებ ტურიზმის ეროვნული ადმინისტრაციის ხელმძღვანელმა, მაია ომიაძემ რამდენიმე დღის წინ განაცხადა. მისი თქმით, მიზნობრივი მარკეტინგული კამპანიები და საქართველოს აეროპორტების გაერთიანებასთან მჭიდრო თანამშრომლობა ახალი ავიაკომპანიების მოზიდვას უზრუნველყოფს და ერთობლივი ძალისხმევა პირდაპირ აისახება ვიზიტორთა სტატისტიკაზე, სადაც ტოპ ათეულში ქვეყნების მრავალფეროვნება ფიქსირდება. მონაცემებს თუ ჩავხედავთ, ვნახავთ, რომ წლის პირველ ნახევარში საერთაშორისო ვიზიტორების მიერ განხორციელებული ვიზიტების რაოდენობა 2.7%-ით, 2 734 504-მდე შემცირდა. რაც შეეხება ქვეყნების წილობრივ გადანაწილებას, წლის 6 თვეში ყველაზე მეტი ვიზიტი ტრადიციულად რუსეთიდან შედგა - 610 825 ვიზიტით, რომელსაც თურქეთი და სომხეთი მოჰყვებოდა. ხუთეულშია ისრაელი და აზერბაიჯანი.

69 ათასი ვიზიტი აღირიცხა უკრაინიდან, 67 ათასამდე ყაზახეთიდან, 55ათასამდე ჩინეთიდან, 46 ათასი ბელარუსიიდან და 41 ათასამდე გერმანიიდან.
თხუთმეტეულშია პოლონეთი 17%-იანი მატებით, ინდოეთი, ირანი, - 59 და 47%-იანი კლებით. და ასევე უზბეკეთი 28 ათასი და აშშ 23 ათასი ვიზიტით.

როგორია მესამე კვარტალის პირველი 2 თვის მონაცემები, რამდენად აქტიური იყო ზაფხულის ტურისტული სეზონი აჭარაში?

სტუმარი: თემურ დიასამიძე - ტურიზმის ექსპერტი


#ახალიამბები #BusinessMediaGeorgia