მაისში საქართველოში ინფლაცია 5.7% იყო. საქსტატის მონაცემებით, აპრილთან შედარებით, მაისში ინფლაციის მაჩვენებელი 0.2 პროცენტული პუნქტით შემცირდა.

ინფლაციის მთავარი განმაპირობებელი ტრადიციულად გაძვირებული სურსათია, სადაც 5.2%-იანი ზრდა დაფიქსირდა. მნიშვნელოვნად გაიზარდა ფასები ტრანსპორტის ჯგუფში, განსაკუთრებით საწვავზე, სადაც ზრდამ 22.7%-ს მიაღწია. გარდა ამისა, 7%-ით გაძვირდა საცხოვრებელი, წყალი, ელექტროენერგია და აირი. ალკოჰოლის და თამბაქოს კატეგორიაში ფასების 7.2%-იანი ზრდა დაფიქსირდა, ხოლო ჯანმრთელობასთან დაკავშირებული ხარჯები 5.1%-ით გაძვირდა.

ინფლაციის მონაცემების გარდა, გუშინ ევროპის რეკონსტრუქციისა და განვითარების ბანკმა განახლებული ეკონომიკური ზრდის პროგნოზი გამოაქვეყნა. იბიარდის პროგნოზით საქართველოს ეკონომიკა წელს ნავარაუდევი 5.5%-ის ნაცვლად 6%-ით გაიზრდება. „რეალური მშპ 2026 წელს 6%-ით, ხოლო 2027 წელს 5%-ით გაიზრდება,“ - ვკითხულობთ ანგარიშში.

ამასთან, პროგნოზის თანახმად, საქართველოს უძრავი ქონების, ტრანსპორტისა და განახლებადი ენერგიის სექტორებში საინვესტიციო პროექტების განხორციელებამ შესაძლოა, ეკონომიკური ზრდა კიდევ უფრო დააჩქაროს.

სტუმარი: ირაკლი მაკალათია - ეკონომისტი

#ახალიამბები #BusinessMediaGeorgia