საქართველოს ბანკსა და გაეროს ქალთა ორგანიზაციას შორის ქალთა ეკონომიკური გაძლიერებისა და მეწარმეობის მხარდაჭერის მიმართულებით თანამშრომლობის მემორანდუმი გაფორმდა. პარტნიორობის ფარგლებში, ბანკი მიზნად ისახავს, ხელი შეუწყოს მეწარმე ქალებისთვის განვითარების ახალი შესაძლებლობების შექმნას. ინიციატივა ხორციელდება UN Women-ის პროგრამის „ქალთა ლიდერობის გაზრდა მდგრადი და მშვიდობიანი საზოგადოებებისთვის“ ფარგლებში, რომელიც დანიის საგარეო საქმეთა სამინისტროს მხარდაჭერით მიმდინარეობს და მას UN Women-ის ოფისები საქართველოში, მოლდოვასა და უკრაინაში, ევროპის და ცენტრალური აზიის რეგიონულ ოფისთან ერთად ახორციელებენ. პარტნიორობის მიზანია მეწარმე ქალებისთვის ბაზარზე წვდომის, გაყიდვების შესაძლებლობების, ბიზნეს-კავშირებისა და პროფესიული განვითარების ხელშეწყობა. სწორედ ამ მიზნით, 2025 წელს UN Women-სა და „ბაზარი ორბელიანის“ შორის თანამშრომლობა დაიწყო, რომლის ფარგლებშიც ყოველთვიურად იმართებოდა მეწარმე ქალების გამოფენა-გაყიდვები. ინიციატივამ წლის განმავლობაში დაახლოებით 300 მეწარმე ქალს უმასპინძლა. პროექტის წარმატების საფუძველზე, თანამშრომლობა 2026 წელსაც გაგრძელდა, ხოლო მიმდინარე წელს ინიციატივას საქართველოს ბანკიც შეუერთდა. თანამშრომლობის ფარგლებში, საქართველოს ბანკი UN Women-ს არამატერიალურ, პრო ბონო და სხვადასხვა სახის მხარდამჭერ აქტივობებს შესთავაზებს, რომლებიც ქალთა ეკონომიკური გაძლიერებისა და ქალთა მეწარმეობის განვითარებას შეუწყობს ხელს.


#ახალიამბები #BusinessMediaGeorgia