საქართველოს უნივერსიტეტმა Quantum Technologies Conference 2026-ს უმასპინძლა, რომელიც კვანტური ტექნოლოგიების სფეროში მკვლევრებს, ლექტორებს, სტუდენტებსა და საერთაშორისო ექსპერტებს აერთიანებდა. ღონისძიება უნივერსიტეტის კვანტური გამოთვლებისა და ხელოვნური ინტელექტის ცენტრის ორგანიზებით გაიმართა და მიზნად ისახავდა ამ სწრაფად განვითარებადი მიმართულების პოპულარიზაციასა და თანამშრომლობის გაძლიერებას. კონფერენციის პროგრამა მოიცავდა კვანტური გამოთვლების, ალგორითმების, კრიპტოგრაფიის, კომუნიკაციების, სენსორიკისა და კვანტური მასალების თემებს. განსაკუთრებული ყურადღება დაეთმო იმ ტექნოლოგიურ გავლენებს, რომლებიც კიბერუსაფრთხოებას, ხელოვნურ ინტელექტს, მედიცინას და სხვა სტრატეგიულ სფეროებს უკავშირდება. ღონისძიების ფარგლებში გაიმართა პანელური დისკუსია - „საქართველო კვანტურ ეპოქაში: გამოწვევები და შესაძლებლობები“, სადაც მონაწილეებმა იმსჯელეს ქვეყნის პოტენციალზე, განათლებისა და კვლევების გაძლიერების აუცილებლობაზე და საერთაშორისო თანამშრომლობის მნიშვნელობაზე. კონფერენცია შეფასდა როგორც მნიშვნელოვანი ნაბიჯი საქართველოში კვანტური მეცნიერების განვითარების მიმართულებით.


#ახალიამბები #BusinessMediaGeorgia