აშშ-ის პრეზიდენტმა დონალდ ტრამპმა გუშინ განაცხადა, რომ გრენლანდიაზე უთანხმოების გამო, დანიას, ნორვეგიას, შვედეთს, საფრანგეთს, გერმანიას, დიდ ბრიტანეთს, ნიდერლანდებსა და ფინეთს 10%-იან ტარიფებს უწესებს. აშშ-ის პრეზიდენტის თქმით, აღნიშნულ ქვეყნებს 2026 წლის 1-ელი თებერვლიდან 10%-იანი ტარიფები დაუწესდებათ, 1-ელი ივნისიდან კი ტარიფები 25%-მდე გაიზრდება და იქამდე იმოქმედებს, სანამ “გრენლანდიის სრულ და მთლიან შესყიდვაზე არ იქნება მიღწეული შეთანხმება”.

შანტაჟს არ დავექვემდებარებით და პასუხიც იქნება, აცხადებენ ევროპელი ლიდერები. ნატო-ს წევრი რვა ქვეყანა ამის საპასუხოდ კი ერთობლივ განცხადებას ავრცელებს. განცხადებაში ნათქვამია, რომ „ტარიფების მუქარა ძირს უთხრის ტრანსატლანტიკურ ურთიერთობებს და სახიფათო დაღმავალი სპირალის საფრთხეს ქმნის".

წერილში ქვეყნები კიდევ ერთხელ ადასტურებენ, რომ ისინი „სრულ სოლიდარობას უცხადებენ დანიის სამეფოს და გრენლანდიელ ხალხს“. „ჩვენ მზად ვართ დიალოგისთვის სუვერენიტეტისა და ტერიტორიული მთლიანობის პრინციპებზე დაყრდნობით, რომლებსაც მტკიცედ ვუჭერთ მხარს“, - აღნიშნულია განცხადებაში. განცხადების ავტორები არიან: დანია, ფინეთი, საფრანგეთი, გერმანია, ნიდერლანდები, ნორვეგია, შვედეთი და დიდი ბრიტანეთი.

მოკლედ, უთანხმოება გრენლანდიის გარშემო გრძელდება, დიდი ალბათობით, სრულიად უშედეგოდ ჩაიარა გასულ კვირაში შეხვედრებმა შეერთებულ შტატებში, რომელსაც დანიის და გრენლანდიის ოფიციალური პირები მონაწილეობდნენ. ფაქტი ერთია, ეს არის კიდევ ერთი ღია თემა რომელიც გახდა ევროპის წამყვანი ქვეყნების და შეერთებული შტატების დაპირისპირების საგანი, რომელმაც მათი თქმით, შეიძლება ნატოს არსებობაც დააყენოს კითხვის ნიშნის ქვეშ.

რა ხდება გრენლანდიის ირგვლივ და რას მოასწავებს ეს დაპირისპირება?

#ახალიამბები #BusinessMediaGeorgia