სოციალურ ქსელში გავრცელებული ეს ვიდეო მასალა, რომელიც ალბათ გუშინ ბევრმა თქვენგანმა ნახეთ, კიდევ ერთხელ ასახავს იმ მდგომარეობას რაც ქვეყანაში მომხმარებელთა უფლებების მხრივ არსებობს. 23 წამიან ვიდეოში ატმის რეალიზატორი სასურველი შეფერილობის მისაღებად პროდუქციას ღებავს, რითაც სურსათი მიზანმიმართულად ბინძურდება.

ვიდეოს საპასუხოდ გუშინ სურსათის ეროვნულმა სააგენტომ განცხადება გაავრცელა, რომლის თანახმადაც მყისიერი რეაგირებისთვის მათ სამართალდამცავებს მიმართეს.

2025 წლის 5 თვეში საქართველომ სულ 94 ათას დოლარამდე ღირებულების 213 ტონა ატამი შეიძინა, რაც გასული წლის იმპორტს 73%-ით ჩამორჩება. ძირითადი საიმპორტო ქვეყანა თურქეთი იყო, მეორე ადგილს კი მცირე მოცულობით აზერბაიჯანი იკავებს.

რაც შეეხება ექსპორტს, საანგარიშო პერიოდში ქვეყნიდან 61 ათასი დოლარის ღირებულების 49 ტონა ატამი მხოლოდ სომხეთში გაიყიდა.

სეს-ში აცხადებენ, რომ სამომხმარებლო ბაზარზე განთავსებულ ხილსა და ბოსტნეულს მუდმივად ამოწმებს. მიმდინარეობს მონიტორინგი და ნიმუშების აღება სხვადასხვა მაჩვენებელზე – მათ შორის, პესტიციდებსა და მძიმე მეტალებზე. ლაბორატორიული კვლევის შედეგები და აღმოჩენილი შეუსაბამობები კი საჯაროა და სააგენტოს ვებგვერდზე ხელმისაწვდომია.

რამდენად სრულყოფილია მონიტორინგი და შესაბამისად დაცულია მომხმარებელი?

სტუმარი: ელენე შატბერაშვილი - ასოციაცია „ელკანას“ წარმომადგენელი;

#ახალიამბები #BusinessMediaGeorgia