სამხედრო დაძაბულობის ფონზე ისრაელიდან საქართველოში ფრენები ეტაპობრივად იზღუდება. ტურისტული ნაკადების ერთ-ერთი მთავარი ბაზარი – ისრაელი – ამ დროისთვის პრაქტიკულად სრულად გაუქმებული მიმართულებაა. თუ გავითვალისწინებთ ისრაელელი ვიზიტორების რაოდენობას საქართველოს ტურისტულ სტატისტიკაში, შეგვიძლია ვივარაუდოთ, რომ ისრაელ-ირანს შორის მიმდინარე საომარი მოქმედებები ზაფხულის ცხელ სეზონზე ინდუსტრიას მნიშვნელოვნად დააზარალებს.

მეტი სიცხადისთვის მცირე სტატისტიკაც - მაგ. 2024 წელს საქართველოში ტურისტული ვიზიტების მიხედვით ქვეყნების რეიტინგში ისრაელი მეოთხე ადგილს იკავებს. მას რუსეთი, თურქეთი და სომხეთი უსწრებენ. გასულ წელს ისრაელიდან საქართველოში 310 982 ვიზიტი შესრულდა, რაც 2023 წლის მაჩვენებელს 43.3%-ით აღემატება.

მიმდინარე წლის პირველ კვარტალში კი 80 896 ვიზიტი დაფიქსირდა, რაც თითქმის გაორმაგებული მაჩვენებელია.

მოკლევადიან პერიოდში ისრაელიდან ტურიზმის შემცირების რისკებზე თიბისი კაპიტალიც წერს. მოვლენათა შესაძლო განვითარების სხვადასხვა სცენარში სხვადასხვა ეფექტია მოსალოდნელი, თუმცა TBC Capital-ი გამოყოფს გადაცემის ძირითად არხებს. ორგანიზაციის შეფასებით, მოკლევადიან პერიოდში ყველაზე მოწყვლად ტურიზმი იქნება. ისრაელიდან ჯავშნების გაუქმებაზე BM.GE-ისთან საუბრობენ ტურისტული კომპანიების წარმომადგენლებიც.

სტუმარი: ვანო ვაშაყმაძე - ტურიზმის ექსპერტი

#ახალიამბები #BusinessMediaGeorgia