გუშინ საღამოს თბილისში, აღმაშენებლის ხეივნის 129 ნომერში, ოფიციალურად გაიხსნა Automobili Lamborghini-ს პირველი შოურუმი საქართველოში. ლეგენდარულ იტალიურ ბრენდს საქართველოში ექსკლუზიურად „თეგეტა ჰოლდინგი“ წარმოადგენს. ბრენდის კონცეპტუალური შოურუმი Lamborghini-ს გაბედულ, ავთენტურ და იტალიური ხიბლით სავსე იდენტობას სრულად ასახავს. საქართველოში ლამბორგინის პირველი შოურუმის გახსნის ღონისძიებაზე სპეციალური სტუმარი შტეფან ვინკელმანი იყო, Automobili Lamborghini-ს პრეზიდენტი და აღმასრულებელი დირექტორი, რომელმაც მედიის წარმომადგენლებისთვის პრესკონფერენცია გამართა და ბრენდის ისტორიის, განვითარებისა და მათ შორის პორტფელში ქართული ბაზრის დამატების შესახებ ყველა კითხვას ამომწურავად უპასუხა. ამის შემდეგ ახალგახსნილ შოურუმში Lamborghini Temerario-ს დებიუტი შედგა - ეს არის სუპერსპორტული ავტომობილი, რომელიც სრულყოფს ბრენდის ჰიბრიდული მოდელების ხაზს. როგორც ლამბორგინის წარმომადგენლები განმარტავენ, ამ მოდელის გამორჩეული მახასიათებელია 920-ცხენისძალიანი, ორ ტურბოზე მომუშავე V8 ჰიბრიდული ძრავის სისტემა, რომელიც უზრუნველყოფს გამორჩეულ სიმძლავრესა და კომფორტს შეუდარებელი მართვის გამოცდილებისთვის.


#ახალიამბები #BusinessMediaGeorgia