კანონი ენერგოეფექტურობის შესახებ საქართველოს პარლამენტმა 2020 წელს დაამტკიცა, ენერგოეფექტურობის მინიმალური სტანდარტების დაცვა კი 2023 წლიდან გახდა სავალდებულო. კერძოდ, ენერგოეფექტურობის მინიმალური სტანდარტების დაკმაყოფილების გარეშე ადმინისტრაციული ორგანოს მხრიდან სამშენებლო ნებართვები აღარ გაიცემა. აღნიშნული ეხება ყველა ახალ შენობას, განურჩევლად საკუთრების ფორმისა. თუ კერძო ან საჯარო დანიშნულების შენობა 50 კვადრატულ მეტრზე მეტია, მან ენერგოეფექტიანობის მინიმალური მოთხოვნები უნდა დააკმაყოფილოს. რეფორმის შემდეგ ეტაპზე შენობებს ენერგო კლასი მიენიჭება, რომელიც განსაზღვრავს, ენერგოეფექტურობის რა სტანდარტს შეესაბამება შენობა.

სტატუსი შენობებს შესაბამისი კვალიფიკაციის მქონე პირმა უნდა მიანიჭოს. შესაბამისად, გათვალისწინებულია ახალი პროფესიის შემოღება, რომლის მიერ შენობის ენერგოინსპექტირების სერტიფიკატის გაცემის გარეშე შენობები ექსპლუატაციაში არ მიიღება. რეფორმის შემდეგ ეტაპზე კიდევ სხვა არაერთი რეგულაციის ამოქმედებაა გეგმაში, რამაც ქვეყანაში ენერგოეფექტურობის სტანდარტების დამკვიდრებას უნდა შეუწყოს ხელი. ამ მიმართულებით, რეფორმის გატარებაში საქართველოს ევროკავშირი ეხმარებოდა. აღნიშნული დონორული დაფინანსება ტექნიკური მხარდაჭერის პროგრამის სახით საქართველოს მთავრობისთვის 8 მილიონი ევროს დაფინანსებას ითვალისწინებდა.

რა გაკეთდა ევროკავშირის დახმარებით, რა პროგრესი აქვს რეფორმას, სად გვაქვს ჩამორჩენა და რა ახალ რეგულაციებს ითვალისწინებს ენერგოეფექტურობის კანონი მომავალში?

სტუმარი: ვახტანგ ბეგაშვილი - ენერგეტიკის მიმართულებით საკონსულტაციო კომპანია MEC-ის ხელმძღვანელი

#ახალიამბები #BusinessMediaGeorgia