საქართველოში FDI-ს მოცულობა 2025 წლის I კვარტალში 7,7%-ით, 179.4 მლნ დოლარამდე შემცირდა. ინვესტიციების შემცირებაზე გავლენა მოახდინა ინვესტორთა მიმართ სავალო ვალდებულებების მომსახურებამ, რამაც 33 მილიონი დოლარი შეადგინა, ინვესტიციების შემომავალი ნაკადები კი 150 მილიონი დოლარი იყო რეინვესტიციების სახით და 62 მილიონი დოლარი კომპანიების მფლობელთა მხრიდან სააქციო კაპიტალის შევსებით. შესაბამისად, მთლიანობაში საინვესტიციო ნაკადებმა 179 მილიონი დოლარი შეადგინა.

ენერგეტიკა, ინფორმაცია და კომუნიკაცია და დამამუშავებელი მრეწველობა- ასე გამოიყურება ის ძირითადი სექტორები, სადაც პირველი კვარტლის მდგომარეობით ყველაზე მეტი FDI ჩაიდო. უფრო კონკრეტულად, ენერგეტიკაში 70 მილიონი დოლარის ინვესტიცია განხორციელდა, 8,5 მილიონი დოლარით ნაკლები, ვიდრე წინა წლის ანალოგიურ პერიოდში. 2,8-ჯერ არის გაზრდილი ინვესტიციები ინფორმაციისა და კომუნიკაციის სექტორში. თუ გასულ წელს ამ სექტორში 18,1 მილიონი დოლარის ინვესტიცია ჩაიდო, წელს პირველ კვარტალში ეს მაჩვენებელი 52,3 მილიონ დოლარამდე გაიზარდა. ინვესტიციები გაზრდილია მშენებლობის სექტორშიც, რამაც პირველ კვარტალში 20,5 მილიონი დოლარი შეადგინა.

მნიშვნელოვანი კლებაა უძრავი ქონების სექტორში. თუ გასული წლის პირველ კვარტალში სექტორში 19,3 მილიონი დოლარის FDI ჩაიდო, წელს პირველ კვარტალში ეს მაჩვენებელი 5,9 მილიონ დოლარამდეა შემცირებული.

სტუმრები: ნატო ბოჭორიშვილი - საქართველოს უძრავი ქონების ეროვნული ასოციაციის პრეზიდენტი;
ბესო ორთოიძე - "არსის" გენერალური დირექტორი;
დავით კიზირია - ციფრული ტრანსფორმაციის კონსორციუმის კოორდინატორი.

#ახალიამბები #BusinessMediaGeorgia