გასული კვირა მნიშვნელოვანი იყო იმდენად, რამდენადაც “ქართული ოცნების” მესვეურების საჯაროდ გაკეთებულმა კომენტარებმა კიდევ ერთხელ გამოაჩინა, რამდენად რეალური შეიძლება იყოს ევროკავშირთან ვიზალიბერალიზაციის დაკარგვის რისკი.

ფაქტია, არსებული გეოპოლიტიკური ვითარების გათვალისწინებით ევროკავშირმა შესაძლებელია პროცესში პოლიტიკური ინსტრუმენტის კომპონენტი შემოიტანოს, რაც რეალურს ხდის საფრთხეს, რომ დემოკრატიის უკუსვლის და ადამიანის უფლებების დარღვევების გამო, ვიზალიბერალიზაციის მონაპოვარიც რისკის ქვეშ დადგეს. ფაქტია პროცესები დაიძრა, ევროკავშირი ვიზალიბერალიზაციის შეჩერების მექანიზმის გამარტივებას წლის ბოლომდე აპირებს. ეს შეეხება 61 ქვეყანას, მათ შორის საქართველოს და იმ ქვეყნებს, რომლებიც ევროკავშირთან უვიზო მიმოსვლით სარგებლობენ.

საქართველოს მოქალაქეები 2017 წლის შემდეგ სარგებლობენ უვიზო მიმოსვლით და მათ კარგად აქვთ გაცნობიერებული თუ რა სიკეთეები მოუტანა მათ ამ რეჟიმმა. “რაიმე ღვთიური მანანაა ეს უვიზო მიმოსვლა?” - ასეთი კითხვა დასვა ქართული ოცნების პარლამენტის თავმჯდომარემ. ვიზალიბერალიზაცია შეიძლება ღვთიური მანანა იყოს ბევრისთვის. ათიათასობით ადამიანმა შეძლო სასიცოცხლო სამედიცინო დახმარების მიღება ევროპაში, ლეგალური დროებითი მიგრაცია და დასაქმება, ასევე, ბევრმა მოქალაქემ ისარგებლა ტურისტული მოგზაურობით. ვიზალიბერალიზაციის სიკეთეებზე საუბარი დაუსრულებლად შეიძლება, ამ სტუდიაში გვისაუბრია და ვფიქრობ კიდევ ვისაუბრებთ ვიზალიბერალიზაციის საკითხებზე უფრო ფართო ჭრილში, თუმცა დღეს ჩემს სტუმართან ერთად, გადავწყვიტე ვისაუბრო, რა გავლენა ჰქონდა ვიზალიბერალიზაციას ტურიზმზე და მისი დაკარგვა, რაც ფაქტია რეალური საფრთხეა მმართველი პარტიის ანტიდასავლური პოლიტიკის ფონზე, რამდენად დააზარალებს ამ ინდუსტრიას, ქვეყანას და თითოეულ მოქალაქეს, რომელთაც საკუთარ თავზე გამოცადეს ევროკავშირთან უვიზო მიმოსვლის რეჟიმის სიკეთეები.

სტუმარი: სოფო დარბაიძე - ტუროპერატორი, “მილქი ვეის” თანადამფუძნებელი;

#ახალიამბები #BusinessMediaGeorgia