რამდენიმე დღის წინ, მაღალი მოდის გლობალურ ბაზარზე საინტერესო შემთხვევა მოხდა: ბირკინის და კელის ლიმიტირებული ძვირად ღირებული ჩანთებით სახელგანთქმულმა ფრანგულმა Hermes-მა საბაზრო კაპიტალიზაციით მის პირდაპირ კონკურენტს, მაღალი მოდის კონგლომერატ LVMH-ს აჯობა. Hermes-ის აქციის ფასი ბოლო წლებში მდგრადად იზრდებოდა, ხოლო ხუთწლიან პერიოდში კომპანიის საბაზრო კაპიტალიზაცია 315%-ით გაიზარდა, ანუ გაოთხმაგდა.

პარალელურად ამისა, თუ ბოლო დროინდელ მნიშვნელოვან კლებას არ ჩავთვლით, LVMH-ის აქციების ფასიც იზრდებოდა, მაგრამ რამდენიმე დღის წინ, ბერნარ არნოს კომპანიამ პროგნოზირებულზე ცუდი ფინანსური შედეგები გამოაქვეყნა, რამაც ინვესტორების განწყობებზე იმოქმედა.LVMH-ის აქციები ერთ დღეში დაახლოებით 8%-ით გაუფასურდა, რითაც Hermes-მა იხეირა და მაღალი მოდის იმპერატორის წოდება მოიპოვა, ოღონდ მცირე ხნით. უახლესი მონაცემებით, ფუფუნების საგნების ბაზარზე ლიდერად ჯერაც LVMH რჩება, რომლის საბაზრო კაპიტალიზაცია $297 მილიარდია, როცა Hermes-ის შეფასება $280 მილიარდია.

ისე კი, ბოლო თვეებში და კვარტალებში, მაღალი მოდის სექტორში საინტერესო ტენდენციას ვხვდებით, რომელიც, უმეტესწილად, ნეგატიურია. მიმდინარე წლის თებერვალში დაფიქსირებული ლოკალური პიკის შემდეგ, საფონდო ბირჟაზე დალისტული დიდი ოთხეულის, მათ შორის Burberry-ის, LVMH-ის, Christian Dior-ის, და Kering-ის აქციების ფასები საკმაოდ მკვეთრად არის შემცირებული.

#ახალიამბები #BusinessMediaGeorgia