მთავრობა პარლამენტს სტარტაპებისთვის 10 წლიანი საგადასახადო საშეღავათო პირობების ასამოქმედებლად პროექტს წარუდგენს. გასული წლის 19 მარტს დაანონსებული პროექტის მიხედვით, ინოვაციური სტარტაპები 10 წლის განმავლობაში საგადასახადო შეღავათებით ისარგებლებენ და მათ შორის 3 წლით, ნულოვანი საშემოსავლო გადასახადით დაიბეგრებიან. მთავრობის სხდომაზე პრემიერს არ დაუკონკრეტებია, როდის ამოქმედდება ინიციატივა, რომელიც ჯერ ერთი წლის წინ ჯიტას 10 წლის იუბილეზე დაანონსა.
დეტალებზე არც მთავრობის ადმინისტრაციაში და არც ეკონომიკის სამინისტროში განმარტებები არ გაკეთებულა. 2024 წლის ოქტომბერშიც მიმართა ბიემჯიმ ეკონომიკის სამინისტროს კითხვით, რა ეტაპზეა ცვლილებები, რომლებმაც ქვეყანაში ინოვაციური სტარტაპ ეკოსისტემა უნდა გააძლიეროს. როგორც ინოვაციებისა და ტექნოლოგიების სააგენტოში მაშინ განმარტეს კანონპროექტზე მუშაობა მიმდინარეობ და ის საშემოდგომო სესიაზე უნდა წარდგენილიყო.
მეათე მოწვევის პარლამენტმა მუშაობა ისე დაასრულა პრემიერის დაანონსებული ინიციატივის შესაბამისი სამუშაო დოკუმენტი საკანონმდებლო ორგანოში არ დაფიქსირებულა. 31 მარტს მთავრობის სხდომაზე გაკეთებული განცხადებით პროექტის წარდგენა შესაძლოა მეთერთმეტე მოწვევის პარლამენტს მიმდინარე საგაზაფხულო სესიაზე მოუხდეს.

#ახალიამბები #BusinessMediaGeorgia