სახელმწიფო აგროდაზღვევის პროგრამაზე საუბრით ვიწყებთ გადაცემის ამ ბლოკს. ქვეყანაში დაზღვეული ფართობების მოცულობა მცირდება. სოფლის მეურნეობის სამინისტროს გასული წლის საქმიანობის შემაჯამებელი ანგარიშიდან ირკვევა, რომ ბოლო 5 წელიწადში 19 124 ჰექტარიდან „აგროდაზღვევის“ სახელმწიფო პროგრამით დაზღვეული ფართობები 16, 433 ჰექტარამდე შემცირდა. სოფლის განვითარების სააგენტო აგროდაზღვევის პროგრამას 2014 წლიდან ახორციელებს. პროგრამის დაწყებიდან 10 წლის განმავლობაში გაიცა 179,097 სადაზღვევო პოლისი, დაიზღვა 172,106 ფართობი, სახელმწიფომ კი 135.7 მლნ ლარის პრემია გადაიხადა. მიუხედავად იმისა, რომ პროგრამით გათვალისწინებულ ყველა კულტურაზე პრემიის 70%-ს სახელმწიფო იხდის, მასში მონაწილეობა ფერმერებისთვის მაინც ნაკლებად მიმზიდველია.

დარგობრივი ასოციაციის ინფორმაციით, აგროდაზღვევის პროგრამაში ამ ეტაპზე ფერმერთა მხოლოდ 10%-ია ჩართული. პროგრამის ამოქმედებიდან 10 წლის თავზე, 2024 წელს პროგრამაში გარკვეული ცვლილებები შევიდა. შესაძლებელი გახდა 10 ჰა-ს ნაცვლად 20 ჰა-მდე მიწის ნაკვეთის დაზღვევა, გარდა მარცვლეული კულტურებისა, სადაც მიწის მაქსიმალური ფართობი 100 ჰა-ს შეადგენს. სასოფლო-სამეურნეო კოოპერატივების შემთხვევაში, სადაზღვევო პრემიის მაქსიმალური ოდენობა 50,000 ლარით განისაზღვრა, მოხდა სადაზღვევო ტარიფების მინიმუმის და მაქსიმუმის განსაზღვრა.

შემუშავდა ასევე ზარალის შეფასების გაიდლაინი, რაც ფერმერების მხრიდან ერთ-ერთ მთავარ მიზეზად სახელდებოდა, რის გამოც თავს იკავებდნენ პროგრამაში ჩართვისგან. მიუხედავად იმისა, რომ სახელმწიფო აგროდაზღვევის ფარგლებში საკმაოდ დიდი მოცულობის თანხებს ხარჯავს, ფერმერების ნაწილისთვის პროგრამის პირობები მაინც მიუღებელია. რატომ არ ერთვებიან ფერმერები აგროდაზღვევის სახელმწიფო პროგრამაში, როგორ შეიძლება მეტი ფართობი დაიზღვეს და რა არის ის მთავარი გამოწვევები, რაც პროგრამას აქვს?

სტუმარი: რატი კოჭლამაზაშვილი - ფერმერთა ასოციაციის თავმჯდომარის მოადგილე

#ახალიამბები #BusinessMediaGeorgia