www.Mtisambebi.ge - „ახალგაზრდობა და მთელი ცხოვრება გავატარე ხულოს რაიონის სოფელ ღორჯომის თემის სოფელ ტუნაძეებში. ჩემი ადგილი მოზვავდა, მეწყერი ჩამოვიდა და იქ აღარ იცხოვრებოდა. მივმართე რაიონის ხელმძღვანელობას, რომელმაც შუამდგომლობა გამიწია და ჩამომასახლეს სოფელ გორელოვკაში. 2008 წელს ჩამოვედით, კენჭისყრა ჩატარდა, ქაღალდები ამოვიღეთ და ეს სახლი შემხვდა. მთავრობას ცენტი არ გამოურთმევია არაფერში. მას მერე ვცხოვრობთ აქ, მაგრამ ცუდი ის არის, რომ დღემდე სახლი არ არის ჩვენს საკუთრებაში. ძველი პატრონი რომ მოვიდეს და მითხრას, ჩემიაო, ხომ გავხდები იძულებული, წავიდე აქედან. ხელისუფლებას სადაც საშუალება ჰქონდა, იქ ჩამასახლა, მადლობელი ვართ, მაგრამ კარგი იქნება, ცოტა ყურადღებას თუ მოგვაქცევენ, რომ სახლები დაგვიკანონდეს“, -ამბობს კაკო ბერიძე.