www.Reginfo.ge - „ცვლილებები რაც მოხდა, განპირობებულია იმით, რომ იმპორტის რაოდენობა არის ძალიან გაზრდილი. ქვეყანაში მოხმარება გაიზარდა მნიშვნელოვნად. რაოდენობრივად გაზრდილია ექსპორტიც, თუმცა თანხობრივ მაჩვენებლებში ვინაიდან საექსპორტო ძირითად ბაზრებზე ფასები არის ძალიან დაცემული, ექსპორტი ვერ დაეწია იმპორტს და ამის გამო არის სწორედ ის, რაც ხდება“, – განაცხადა საქართველოს პრემიერ – მინისტრმა გიორგი კვირიკაშვილმა ლარის გაუფასურებასთან დაკავშირებით.
პრემიერის განმარტებით, უკვე დაწყებულია იმპორტის კორექტირება და კურსის დასტაბილურება აუცილებლად მოხდება.
„მე დიდი იმედი მაქვს, რომ მომავალი თვეების განმავლობაში ლარი აუცილებლად უნდა გამყარდეს ყველა ლოგიკით, რომელიც ჩვენ გვაქვს და ასევე გარკვეული ნაბიჯების გადადგმა იგეგმება, გარკვეული რეგულაციების კუთხით იმისათვის, რომ ჩვენ დავეხმაროთ ლარის დასტაბილურებას და გამყარებას“, – აღნიშნა პრემიერმა.
კითხვაზე, კონკრეტულად რა ნაბიჯების გადადგმას აპირებს მთავრობა, პრემიერმა განმარტა, რომ რამდენიმე დღეში ეროვნულ ბანკთან კოორდინირებულად მოხდება ახალი ნაბიჯების გახმოვანება.
„კიდევ ერთხელ მინდა ვთქვა, რომ ეს არის პროცესი, რომელიც ქვეყანაში დადებითი პროცესით არის პრინციპში განპირობებული. მოხმარება არის გაზრდილი, ექსპორტი ვერ დაეწია მოხმარებას გამომდინარე იქიდან, რომ საექსპორტო ბაზრებზე ფასები არის დავარდნილი, მაგრამ გაჯანსაღების პროცესი მიდის და ეს პროცესი შეუქცევადი იქნება აუცილებლად“, – განაცხადა კვირიკაშვილმა.
საქართველოს ეროვნული ბანკის 13 ნოემბრის მონაცემებით, ოფიციალური გაცვლითი კურსის მიხედვით, ერთი დოლარის ფასი 2.4899 ლარია.