ფონდი „ღია საზოგადოება - საქართველოს“ ოფისში სკოლამდელი განათლების ახალი სტრატეგიის მხარდამჭერი დოკუმენტების სამუშაო ვერსიების განხილვა გაიმართა. დოკუმენტები ერთობლივად წარადგინეს განათლებისა და მეცნიერების სამინისტროსა და UNICEF-ის წარმომადგენლებმა.
2014 წელს საქართველოს განათლებისა და მეცნიერების სამინისტრომ, 5 წლის ასაკის ბავშვთა საყოველთაო განათლების ხელშეწყობის მიზნით, ახალი სტრატეგია შეიმუშავა. სამინისტროს ინიციატივით და გაეროს ბავშვთა ფონდის (UNICEF) მხარდაჭერით, საერთაშორისო ექსპერტების ხელმძღვანელობითა და ადგილობრივი ექსპერტების მონაწილეობით შემუშავდა 5 წლის ასაკის ბავშვთა სასკოლო მზაობის ხელშემწყობი დოკუმენტების სამუშაო ვერსიები:
• სასკოლო მზაობის პროგრამა 5 წლის ასაკის ბავშვებისთვის;
• სასკოლო მზაობის პროგრამის ტრენინგის სახელმძღვანელო;
• სკოლამდელი განათლების მასწავლებელთა კვალიფიკაციის ამაღლების სისტემის ჩარჩო;
• სკოლამდელი განათლების მომსახურების სტანდარტები და შეფასების ინსტრუმენტი.
2015 წელს დაგეგმილია შემუშავებული რესურსების სპეციალისტებთან და სხვადასხვა დაინტერესებულ მხარეებთან საბოლოო განხილვა, განათლებისა და მეცნიერების სამინისტროს მიერ დოკუმენტების დამტკიცება და სასკოლო მზაობის პროგრამის პილოტირება.
საქართველოს განათლებისა და მეცნიერების სამინისტროსა და გაეროს ბავშვთა ფონდის ერთობლივი ინიციატივის ფარგლებში სკოლამდელი განათლების განვითარებისთვის მუშაობა გაგრძელდება.