ქუთაისის აკ. წერეთლის სახელობის პირველი საჯარო სკოლა 185 წლის გახდა. 27 ნოემბერს საიუბილეო ღონისძიებები სკოლის შენობაში მუზეუმის გახსნით დაიწყო, რომელსაც ბევრ საპატიო სტუმართან და ცნობილ კურსდამთავრებულთან ერთად, განათლებისა და მეცნიერების მინისტრის პირველი მოადგილე ქეთევან ნატრიაშვილი დაესწრო.
ქუთაისის პირველი საჯარო სკოლის შენობა ისტორიული ძეგლია და კულტურულ მემკვიდრეობას განეკუთვნება. სკოლა დამთავრებული აქვს რამდენიმე ასეულ საზოგადო მოღვაწეს, მათ შორის აკაკი წერეთელს, ვლადიმერ მაიაკოვსკის, პაოლო იაშვილს, ტიციან ტაბიძეს, ნიკო ნიკოლაძეს, ექვთიმე თაყაიშვილს და სხვებს.
1830 წელს ქუთაისში საშუალო ტიპის სამაზრო სასწავლებელი დაარსდა, რომელიც 1850წ. თებერვალში, ქუთაისის გუბერნიის შექმნასთან დაკავშირებით, გიმნაზიად გადაკეთდა. 1878 -79 სასწავლო წლიდან კლასიკური ენების – ლათინურისა და ძველი ბერძნულის სწავლების შემოღების გამო, სასწავლებელს კლასიკური გიმნაზია ეწოდა. ეს სკოლა თავისებური მემორიალია იმ მრავალრიცხოვანი შემოქმედი ადამიანებისა, რომლებმაც შორს გაუთქვეს სახელი ქართულ კულტურას, ლიტერატურასა და ხელოვნებას.