სუპერ მძიმე წონითი კატეგორიის ბოქსიორის თორნიკე პურიჭამიაშვილის 2014 წლის 26 ოქტომბრის გამარჯვება თურქეთის რინგზე.
სერგო დავლიანიძის რუბრიკა - კრივი და ქართველი მოკრივეები.
ქართველმა მოკრივეებმა თურქეთის ქალაქ სამსუნში 2014 წლის 26 ოქტომბერს ჩატარებულ ერთდღიან ტურნირზე იასპარეზეს. 7 ქართველი მებრძოლი, მასპინძელთა წინააღმდეგ შემდეგი შემადგენლობით წარსდგა: გელა აბაშიძე, გიორგი გიორგაძე, ნიკა სეხნიაშვილი, ალეკო ჩადაშვილი, რაულ თუთარაული, თორნიკე პურიჭამიაშვილი და ალექსანდრე დოკვაძე.
შვიდიდან სამ შემთხვევაში თურქმა არბიტრებმა გამარჯვება ქართველ მოკრივეებს მიაკუთვნეს, 4-ში კი მსაჯების გადაწყვეტილებით, წარმატება მასპინძელ მებრძოლებს ხვდათ წილად.
ქართველთაგან გამარჯვება იზეიმეს – 1) სუპერ მძიმე წონით კატეგორიაში მოასპარეზე თორნიკე პურიჭამიაშვილმა, 2) 81 კგ. ნიკა სეხნიაშვილმა და 3) 91 კგ. კილოგრამ წონით კატეგორიაში მონაწილე ალექსანდრე დოკვაძემ.
მონაწილეთა განცხადებით, მასპინძელი რეფერები, აშკარა ტენდენციურობით გამოირჩეოდნენ, რაც განსაკუთრებით გელა აბაშიძის (69 კგ.) შეხვედრისას გამოიხატა.