ეროვნულ სასკოლო ოლიმპიადაში გამარჯვებული რვა საუკეთესო მოსწავლე დიდ ბრიტანეთში გაემგზავრა, ისინი ორი კვირის განმავლობაში ინგლისური ენის შემსწავლელ ინტენსიურ კურსს დიდი ბრიტანეთში, საზაფხულო სკოლაში გაივლიან. მოსწავლეები შეირჩნენ ,,ინგლისური ენის საზაფხულო სკოლიდან საქართველოში’’, რომელსაც განათლებისა და მეცნიერების სამინისტრო ,,ბაქსვუდის საერთაშორისო სკოლა-თბილისის’’ ბაზაზე რამდენიმე წელია ახორციელებს.
ინგლისურენოვანი საზაფხულო სკოლების პროგრამა წელს გაჯერებულია არა მხოლოდ ინგლისურ ენაში აკადემიური საათებით, არამედ არააკადემიური პროგრამებითაც, რაც მოიცავს როგორც სპორტულ აქტივობებს, ისე ინტელექტუალურ თამაშებს, ექსკურსიებს ისტორიულ თუ ღირსშესანიშნავ ადგილებში. მოსწავლეები დიდ ბრიტანეთში ასევე გაეცნობიან იქაურ ტრადიციებსა და კულტურას.
მიმდინარე წელს „საზაფხულო სკოლების პროგრამის“ ფარგლებში, სამინისტრო შემდეგ აქტივობებს ახორციელებს :
ინგლისური ენის საზაფხულო სკოლა საქართველოში
ინგლისური ენის საზაფხულო სკოლები დიდ ბრიტანეთში
ინგლისური ენის საზაფხულო სკოლის მონაწილეები არიან ეროვნული სასწავლო ოლიმპიადის მესამე ტურის შედეგებისა და საქართველოს განათლებისა და მეცნიერების სამინისტროს მიერ ორგანიზებული სხვადასხვა კონკურსების საფუძველზე შერჩეული მე-9, მე-10, მე-11 კლასის მოსწავლეები აფხაზეთის ავტონომიური რესპუბლიკის საჯარო სკოლებისა და ოკუპირებული ტერიტორიიდან და 2008 წლის აგვისტოში განხორციელებული აგრესიის შედეგად, ყოფილი სამხრეთ ოსეთის ავტონომიური ოლქის ტერიტორიიდან იძულებით გადაადგილებული პირები. ინგლისური ენის საზაფხულო სკოლაში მონაწილეობას იღებს 600 მოსწავლე.