ფრანგულმა ავტომწარმოებელმა Renault-მა "ტესტ დრაივზე" მისულ მძღოლებს სიურპრიზი მოუწყო. შემთხვევით შერჩეული მამაკაცები "ტესტ დრაივს" გადიან, მათი გზა კი თავგადასავლებით სავსეა - ჯადოსნურ ღილაკზე თითის ერთი დაჭერა და მძღოლის წინ ეიფელის კოშკის უმშვენიერესი ხედი, ღია კაფეს სტუმრები, შეყვარებული წყვილები, ყვავილების გამყიდველები, ქუჩის მუსიკოსები ენაცვლებიან ერთმანეთს.
თუმცა ჯერ ყველაფერი წინაა... მალე ყველა იფანტება და მძღოლის წინ კაბარეს გრძელფეხება ლამაზმანები იწყებენ ცეკვას. სწორედ ამ დეტალმა "დაღუპა" რეკლამის შემქმნელები - ვიდეო, რომელმაც youtube-ზე 3 მილიონამდე ნახვა დააგროვა, ერთ-ერთი მაყურებლის საჩივრის გამო მომხმარებელთა ასოციაციამ დაბლოკა. "ქორეოგრაფია, მოცეკვავეების ჩაცმულობა და მათი გამომეტყველება ზედმეტად პროვოკაციულია" - ნათქვამია ასოციაციის განცხადებაში.
მართალია, Renault-ი არ ეთანხმება პრეტენზიას, მაგრამ აცხადებს, რომ პროვოკაციულ სცენებს რეკლამიდან ამოიღებს.