ჩვენ ცესკო-ს მიერ ხმების დათვლას დაველოდებით და რამდენიმე დღეში იმ პრობლემების მოგვარებას შევუდგებით, რომელიც ქალაქისთვის აქტუალურია - ამის შესახებ პარტია „ქართული ოცნების“ ცენტრალურ ოფისთან, საკუთარ მხარდამჭერებთან შეხვედრისას თბილისის მერობის კანდიდატმა, კახი კალაძემ განაცხადა.
კალაძის თქმით, წინასაარჩევნო პერიოდში მმართველმა ძალამ ძალიან მნიშვნელოვანი გზა გამოიარა და ბევრი შეხვედრა გაიმართა.
„რაც ყველაზე მნიშვნელოვანია, დედაქალაქის მოსახლეობას ჩვენი იმედი აქვს. იმ პრობლემებს ყველა ვხედავთ, რომელიც დღეს ქალაქისთვის აქტუალურია და ასევე, კარგად გვაქვს გააზრებული, თუ რა უნდა გავაკეთოთ ხვალ, ზეგ, რომ ეს პრობლემები მოგვარებული იყოს. ამ ბრძოლაში მარტო არ იქნებით, ჩემი იმედი გქონდეთ, ძალა ერთობაშია. ჩვენ ამ პრობლემების მოგვარებას ერთად შევძლებთ“, - აღნიშნა კალაძემ.
ამასთან, კალაძემ ამომრჩეველს მხარდაჭერისთვის, დაფასებისთვის და თანადგომისთვის მადლობა გადაუხადა.
„ჩვენ ერთად შევძლებთ, რომ ყოველდღიურ რეჟიმში გამარჯვებები იმ პრობლემებზე ვიზეიმოთ, რომელიც ქალაქისთვის აქტუალურია და თბილისს აწუხებს. მზად ვარ, შრომისთვის და მზად ვარ იმისთვის, რომ ჩემს ქალაქს ვემსახურო. დარწმუნებული ვარ, რომ ხვალიდან, ზეგიდან ყოველდღიურ რეჟიმში ჩვენს გასაკეთებელ საქმეს გავაკეთებთ და ხვალინდელი თბილისი უკეთესი იქნება“, - განაცხადა კალაძემ.
ერთ-ერთი ეგზიტპოლის მიხედვით, თბილისის მერის არჩევნებში კახა კალაძე ლიდერობს და მეორე ტური მოსალოდნელი არ არის.