არასაპარლამენტო ოპოზიციური პარტიების ნაწილი თვითმმართველობის არჩევნებისთვის კოალიციის შექმნას გეგმავს და თბილისის მერობის საერთო კანდიდატის წარდგენასთან დაკავშირებით კონსულტაციებს განაგრძობს.
აღნიშნულ საკითხზე დღეს შეხვედრა "დემოკრატიული მოძრაობისა" და "თავისუფალი საქართველოს" ლიდერებმა გამართეს.
"ნამდვილად შევძლებთ გარდატეხის შეტანას ქართულ პოლიტიკურ რეალობაში ამ არჩევნებზე. ჩვენ ჩვენი მხრიდან მოლაპარაკებისთვის, კომპრომისისთვის მზად ვართ", - განაცხადა ნინო ბურჯანაძემ.
კახა კუკავას განცხადებით, კოალიციაში არაერთი არასაპარლამენტო ოპოზიციური პარტია გაერთიანდება, რომელთა ნაწილთანაც შეხვედრები უკვე გაიმართა.
"თავისუფალი საქართველო", "დემოკრატიული მოძრაობა" და სხვა ოპოზიციური ძალები წარვადგენთ თბილისის მერობის კანდიდატს, რომელსაც ექნება გამარჯვების შანსი და არ იქნება წარდგენილი მხოლოდ იმისთვის, რომ გამოყენებულ იქნას წინასაარჩევნო ტრიბუნა. რაც შეეხება კანდიდატურას, ამაზე საბოლოო გადაწყვეტილება შეიძლება იქნას მიღებული, რაც შეიქმნება კოალიცია", - განაცხადა კახა კუკავამ.
კუკავას თქმით, "თავისუფალ საქართველოს" მიაჩნია, რომ უმჯობესია თბილისის მერობის კანდიდატად ისეთი პირი წარადგინონ, რომელიც არც ერთი პარტიის წარმომადგენელი იქნება.