ინგლისის პრემიერლიგაში, გუშინ, 23-ე ტურის დარჩენილი შეხვედრები გაიმართა. დამაჯერებელ გამარჯვებას მიაღწია „მანჩესტერ სიტიმ“.

ხოსეპ გვარდიოლას გუნდმა, სტუმრად "ეპტონ პარკზე" ლონდონის "ვესტ ჰემი" დიდი ანგარიშით 4-0 დაამარცხა. აღნიშნულ დაპირისპირებაში, ყველაფერი პირველივე ტაიმში გადაწყდა, რომელიც მანჩესტერელებმა 3-0 მოიგეს. გოლები: კევინ დე ბრუინემ, დავიდ სილვამ და ჟესუს გაბრიელმა გაიტანეს. მეორე ნახევარში, სტუმრებმა ერთი გოლი იკმარეს. 67-ე წუთზე პენალტი ზუსტად იაია ტურემ შეასრულა. ამ გამარჯვების შემდეგ, „სიტი“ 46 ქულით სატურნირო ცხრილში მეხუთე ადგილზეა და ლიდერ „ჩელსის“ 10 ქულით ჩამორჩება.

გუშინვე, კიდევ ერთმა მანჩესტერულმა კლუბმა „იუნაიტედმა“ საკუთარ "ოლდ ტრაფორდზე", „ჰალთან“ დაკარგა ქულები - შეხვედრა, გატანილი გოლების გარეშე დასრულდა.