სუნელი ზაფრანა, რომელიც ჯანმრთელობისთვის საშიშ ნივთიერებას შეიცავდა, ნავთლუღის ბაზარში იყიდებოდა. პროდუქცია რეალიზაციიდან უკვე ამოღებულია.

საქმეზე პასუხისგებაში მიცემული ქალის ადვოკატი კახა მაღრაძე აცხადებს, რომ მისი დაცვის ქვეშ მყოფი ბაზარში 20-30 წლის განმავლობაში ვაჭრობდა. ამასთან, ადვოკატის თქმით, ბრალდებულისთვის უცნობი იყო, რომ მის მიერ გამოყენებული საღებავი ჯანმრთელობისთვის საშიში იყო.

გამოძიების ინფორმაციით, ბრალდებული თბილისში მდებარე ერთ-ერთ საამქროში ამზადებდა სხვადასხვა დასახელების სუნელს, რისთვისაც იყენებდა მცენარეებს და საღებავებს, მათ შორის არასაკვები დანიშნულების აზო-საღებავს „სუდან 1“-ს, რომელიც საშიშია ადამიანის ჯანმრთელობისთვის.

საქმეზე გამოძიება საქართველოს სისხლის სამართლის კოდექსის 198-ე მუხლის პირველი ნაწილით მიმდინარეობს, რაც სასჯელის სახედ თავისუფლების აღკვეთას 3-დან 5 წლამდე ვადით ითვალისწინებს.