#ახალიამბები

ჟურნალისტ ნინო ჟიჟილაშვილს სუს-ის კრებსების საქმეზე დაზარალებულის სტატუსი მიანიჭეს. იგი პროკურატურაში მასალების გაჟონვიდან თითქმის 1 წლის თავზე დაიბარეს. დოკუმენტებში ჟიჟილაშვილი 19-ჯერაა ნახსენები. ჩანაწერებში ასახულია მისი საუბარი რესპონდენტებთან. ჟურნალისტის თქმით, უსმენდნენ გადაცემა პოლიტმეტრის ყველა თანამშრომელს, მათ შორის, სტაჟიორებსაც. გამოიკვეთა ტენდენცია, რომ პროკურატურა მასალებში ფიგურანტებს დაზარალებულის სტატუსს მას შემდეგ ანიჭებს, რაც მათი საქმეები სტრასბურგის ადამიანის უფლებათა ევროპულ სასამართლოში იგზავნება. ცნობისთვის, 2021 წლის 13 სექტემბერს ე.წ. კრებსები გავრცელდა, რომელიც სავარაუდოდ, სახელმწიფო უსაფრთხოების სამსახურის მიერ უკანონო ფარული მოსმენა-მიყურადების და თვალთვალის შესახებ 58 000-მდე ფაილს შეიცავდა. ჩანაწერების მიხედვით, უსმენდნენ საჯარო პირებს, ჟურნალისტებს, პოლიტიკოსებს, ელჩებს და საელჩოების თანამშრომლებს. მასალები 2013-2021 წლებით თარიღდება. ჩანაწერების ავთენტურობას ადასტურებენ ის ჟურნალისტები, პოლიტიკოსები და აქტივისტები, რომელთა გვარებიც ფაილებში ფიგურირებს.