გაბრიელ სალოსის ქუჩის მცხოვრებლების ნაწილი, რომელთა საცხოვრებელი ბინებიც სწორედ სპეცოპერაციისას დაზიანდა, სახლში დაბრუნებას შეძლებს. დანარჩენები კი სარეაბილიტაციო სამუშაოების დასრულებას დაელოდებიან.
დედაქალაქის მერიის მუნიციპალური ლაბორატორიის ექსპერტების დასკვნის მიხედვით, დაზიანებული კორპუსი საცხოვრებლად ვარგისია და აღდგენას ექვემდებარება. სპეციალისტებმა ბერი გაბრიელ სალოსის ქუჩაზე მდებარე შენობის გამოკვლევა უკვე დაასრულეს.
საერთო ჯამში დაზიანებულია პირველი სამი სართულის 7 ბინა. უკვე ცნობილია, რომ ბინებს თბილისის კეთილმოწყობის სამსახური გაარემონტებს, რისთვისაც დაახლოებით 300 000 ლარი დაიხარჯება. ამასთან, სპეცოპერაციის დროს დაზიანებული ავტომობილები მეპატრონეებს დღეს დაუბრუნდათ. მათ ექსპერტიზა უტარდებოდა. კომპენსაციების დათვლას კი ქალაქის მთავრობის შესაბამისი სამსახურები მომავალი კვირიდან შეუდგებიან.