მოსახლეობის ნაკლები ინფორმირებულობა თუ ნაჩქარევად მიღებული გადაწყვეტილება: საყოველთაო ჯანდაცვის პროგრამის მიღმა დარჩენილი მოქალაქეების ნაწილს ჯანდაცვის სამინისტროს მიმართ პრეტენზიები და კითხვები აქვს. უკმაყოფილება იმ გადაწყვეტილებას უკავშირდება, რომლის მიხედვით კერძო სადაზღვევო პაკეტებით მოსარგებლე მოქალაქეთა ნაწილის მკურნალობას მე-10 თვეა, სახელმწიფო აღარ აფინანსებს. შეზღუდვა მხოლოდ იმ ადამიანებზე ვრცელდება, რომლებსაც 2017 წლის პირველი იანვრის მონაცემებით კერძო პოლისები ჰქონდათ. თუმცა ცვლილება პაციენტების ნაწილმა მხოლოდ საავადმყოფოებში მოხვედრის დროს აღმოაჩინა. ბაზებთან დაკავშირებულ ხარვეზებს ჯანდაცვის უწყებაშიც აღიარებენ.