მე ვიქნები იქ, სადაც ყველაზე მეტ დისკომფორტს შევუქმნი ბიძინა ივანიშვილის არაფორმალურ მმართველობას და ყველაზე მეტ სარგებელს მოვუტან საზოგადოებას, -ამის შესახებ "ნაციონალური მოძრაობის" ლიდერმა ნიკა მელიამ პარტიის პოლიტსაბჭოს სხდომის დაწყებამდე განაცხადა.
რაც შეეხება მისი საკრებულოში შესვლის საკითხს, მელია ამ ეტაპზე კონკრეტული კომენტარისგან თავს იკავებს.
”მოგეხსენებათ, პარტიის პოლიტიკური საბჭო გახლავთ მთავარი მმართველი ორგანო. ამ მმართველი ორგანოს ფარგლებში, ჩვენ ძალიან ბევრ საკითხზე უნდა ვიმსჯელოთ. უნდა შეფასდეს, თუ რა მოხდა ადგილობრივ არჩევნებზე, სად რა სახის მძიმე დარღვევები იყო ხელისუფლების მხრიდან. ბუნებრივია, გაცილებით უფრო დეტალურად მოგახსენებთ მას შემდეგ, რაც დასრულდება შეხვედრა, რომელიც შესაძლოა, რამდენიმე საათი გაგრძელდეს. მე ვიქნები იქ, სადაც ყველაზე მეტ დისკომფორტს შევუქმნი ბიძინა ივანიშვილის არაფორმალურ მმართველობას და ყველაზე მეტ სარგებელს მოვუტან საზოგადოებას", - განაცხადა მელიამ.
რაც შეეხება საკრებულოში "ნაციონალური მოძრაობის" შესვლის საკითხს, როგორც მელიამ აღნიშნა, ეს არის საკითხი, რომელიც არ განიხილება.
"ყველა არენაზე განახლებულმა "ნაციონალურმა მოძრაობამ" უნდა იბრძოლოს, ეს იქნება საპარლამენტო, ადგილობრივი თვითმმართველობის თუ მშვიდობიანი მანიფესტაციის ფარგლებში. ამიტომ ეს საკითხი არ დგას",-განაცხადა მელიამ.
რამდენი თვის წინ, თბილისის მერობის კანდიდატის წარდგენისას, ნიკა მელიამ განაცხადა, რომ პარლამენტის დატვოვებას გეგმავს.
აღნიშნული გადაწყვეტილების მიზეზად მელიამ ის ფაქტი დაასახელა, რომ „ნაციონალური მოძრაობიდან“ ადგილობრივი თვითმმართველობის არჩევნებზე თბილისის საკრებულოს თავმჯდომარის კანდიდატი იქნება.