ევროკავშირის წარმომადგენლობა საქართველოში დიდი ყურადღებით ადევნებს თვალს საარჩევნო პროცესების განვითარებას,- ამის შესახებ ჟურნალისტებს საქართველოში ევროკავშირის წარმომადგენლობის ხელმძღვანელმა, იანოშ ჰერმანმა განუცხადა.
"საქართველოში მუშაობს ეუთო-ს სადამკვირვებლო მისია, რომელიც შემდგომში უკვე წარადგენს საარჩევნო გარემოსთან დაკავშირებით დეტალურ ანგარიშს. ჩვენ საბოლოო მოსაზრებას ამ ანგარიშზე დაყრდნობით გამოვიტანთ. ამ პერიოდში ჩვენ ვუსმენთ ძალიან ბევრ საინფორმაციო წყაროს. მე ვერ დავარქმევდი ამას სისტემურ დარღვევებს, მაგრამ ცალკეული შემთხვევები ნამდვილად არის. რა ინფორმაციასაც ვიღებთ, ეს დაკავშირებულია ადმინისტრაციული რესურსის გამოყენებასთან. ჩვენ დარწმუნებულები ვართ, რომ საქართველოს მთავრობა ყურადღებას გაამახვილებს ამ ფაქტებზე. რამდენიმე დღის წინ ცესკო-ში ვიმსჯელეთ ამ საკითხსა და ბრალდებებზე. იმედს გამოვთქვამთ, რომ ყველა ეს კონკრეტული საქმე საქართველოს კანონმდებლობის შესაბამისად იქნება გამოძიებული",-აღნიშნა ჰერმანმა.