პოეტი დავით მაღრაძე მოსახლეობას 21 ოქტომბერს თვითმმართველობის არჩევნებზე მისვლისკენ მოუწოდებს.
დავით მაღრაძის განცხადებით, ყველა ხმა მნიშვნელოვანია და აუცილებელია, ამიტომ არჩევნებში მონაწილეობა ყველამ უნდა მიიღოს.
"ვიცი, ბევრი გაჭირვებული ადამიანია, რომელიც ფიქრობს, რომ მის გაჭირვებას არჩევნებზე მისვლა ვერ უშველის. ჩემს გვერდით ბევრი ადამიანია, რომელიც ამის გამო ხმის მისაცემად წასვლას არ აპირებს. მინდა, მივმართო ყველას, თითოეული ადამიანის მოვალეობაა არჩევნებზე მისვლა და ხმის მიცემა, რადგან შთამომავლობაზე უნდა ვიზრუნოთ. არჩევნებზე მისვლით ვქმნით საქართველოს მომავალს, ამიტომ აუცილებელია, ჩვენი ქვეყნისთვის, ჩვენი შვილების მომავლისთვის, არჩევნებზე მივიდეთ და ჩვენი პოზიცია დავაფიქსიროთ", - განაცხადა დავით მაღრაძემ.
დღეს გამართულ პრესკონფერენციაზე დავით მაღრაძემ “ქართული ოცნების" თბილისის მერობის კანდიდატის, კახა კალაძის მხარდაჭერაზეც ისაუბრა.
"კახა კალაძის წარსული არ უნდა დავივიწყოთ, ფეხბურთიდან დაწყებული, პოლიტიკით გაგრძელებული. ის ქართველი ხალხის და ზოგადად სამშობლოს გვერდით დადგა მაშინ, როცა ყველაზე მეტად გვიჭირდა. კალაძე წარმატებული ფეხბურთელი იყო, მან მთელი თავისი კარიერა დატოვა და თავი ქვეყანას მიუძღვნა, მან საკუთარი სიცოცხლის საფრთხეში ჩაგდების ფასად გააკეთა ყველაფერი და ეს უნდა დავუფასოთ", - აღნიშნა მაღრაძემ.