ლიბიაში დაკავებულ ქართველ მეზღვაურებს პატიმრობა 30 დღით გაუგრძელდათ.

ამის შესახებ პირველ არხს საქართველოს საგარეო საქმეთა სამინისტროში განუცხადეს.

საგარეო უწყების დეპარტამენტის საინფორმაციო-საკონსულტაციო სამმართველოს უფროსის, გრიგოლ მაგრაქველიძის თქმით, ზუსტდება, თუ რატომ გაიმართა 17 ოქტომბერს ჩანიშნული სასამართლო პროცესი ერთ დღით ადრე.

მისივე თქმით, დეპარტამენტი კონტაქტზეა მეზღვაურების ადვოკატთან, საქმეში ჩართულია საქართველოს საელჩო ეგვიპტეში, აგრეთვე მიმდინარეობს მოლაპარაკებები ლიბიის სახელმწიფო სტრუქტურებთან.

საგარეო უწყებაში ამბობენ, რომ სიტუაციას ლიბიაში არსებული ვითარება ართულებს.

"გუშინ 16 ოქტომბერს გაიმართა საქმის წინასწარი მოსმენა, წინასწარ მოსმენაზე ხომალდის ეკიპაჟის წევრებს გაუგრძელდათ წინასწარი პატიმრობა 30 დღით. აღსანიშნავია, რომ საქმის არსებითი განხილვა ჯერ არ დაწყებულა, ანუ გუშინდელ მოსმენაზე საქმე ეხებოდა მხოლოდ და მხოლოდ პატიმრობის გაგრძელებას", - აღნიშნავს მაგრაქველიძე.