ყირგიზეთში დღეს პრეზიდენტს ირჩევენ. დამკვირვებლების ნაწილი კენჭისყრას ისტორიულს უწოდებს, რადგან მარათონს გამოკვეთილი ფავორიტი არ ჰყავს.

ერთმანეთს ცენტრალურ აზიაში მდებარე ქვეყნის ორი ყოფილი პრემიერ-მინისტრი უპირისპირდება - სოორონბაი ჟეენბეკოვი, რომელიც მმართველმა პარტიამ წარადგინა და ოპოზიციის ლიდერი ომურბეკ ბაბანოვი.

ყირგიზეთის მოქმედი პრეზიდენტი ალმაზბეკ ატამბაევი არჩევნებში არ მონაწილეობს, რადგან მას მესამედ კენჭისყრის უფლება კანონით არ აქვს.

ყირგიზეთის კანონმდებლობით, ახალი პრეზიდენტი არჩეულად იმ შემთხვევაში ჩაითვლება, თუ მას ხმას ამომრჩეველთა 50%-ზე მეტი მისცემს.

აღსანიშნავია, რომ პირველად ყირგიზეთის ისტორიაში ხმის მიცემა ელექტრონულად ხდება. უბნებზე დამონტაჟებულია ელექტრონული წამკითხველები, რომლებითაც მონაცემები ცენტრალურ საარჩევნო კომისიას გადაეცემა. ამომრჩევლების იდენტიფიცირება თითის ანაბეჭდით ხდება.

კენჭისყრის პროცესს 800 უცხოელი დამკვირვებელი მეთვალყურეობს. არჩევნების პირველი შედეგები ხმის მიცემის დასრულებიდან საათ-ნახევარში გახდება ცნობილი. საარჩევნო უბნები თბილისის დროით 19:00 საათზე დაიხურება.