დავით ოთხმეზურის მკვლელობის საქმეზე განაჩენი შესაძლოა 4 ოქტომბერს გამოცხადდეს. სააპელაციო სასამართლოში განხილვა ფინალურ ეტაპს უახლოვდება. დღევანდელ სხდომაზე დაცვის მხარემ საბოლოო სიტყვა წარმოთქვა.

2004 წელს მოკლული 18 წლის დავით ოთხმეზურის საქმის გამოძიება 12 წლის შემდეგ განახლდა და საგამოძიებო უწყებამ მკვლელობის ბრალდებით ასლან ბეჟანიძე დააკავა. წინასწარ პატიმრობაში გატარებული 9 თვის შემდეგ საქალაქო სასამართლომ გამამართლებელი განაჩენი გამოიტანა.

პროკურატურა ამტკიცებს, რომ საქმეში უტყუარი მტკიცებულებები, მოწმეთა ჩვენებებია, რომლებიც 2004 წლის მკვლელობის საქმეზე ასლან ბეჟანიძეს ამხელს.

ბრალდებულის ადვოკატის ინფორმაციით, მხოლოდ ჩვენებები არ ადასტურებს ბეჟანიძის ბრალეულობას. ადვოკატმა დასკვნით სიტყვაში ყურადღება სწორედ საქმის მოწმეებზე გაამახვილა და განმარტა, რომ მათი ჩვენებები ურთიერთგამომრიცხავია .