ახალი სასწავლო წელი დაიწყო ივანე ჯავახიშვილის სახელობის თბილისის სახელმწიფო უნივერსიტეტში.
4000-მდე აბიტურიენტი უნივერსიტეტის ბაკალავრიატის სტუდენტი გახდა, 2000-მდე ახალგაზრდა კი თსუ-ის სამაგისტრო და სადოქტორო პროგრამებზე ჩაირიცხა.
შეფასებისა და გამოცდების ეროვნული ცენტრის მონაცემების მიხედვით, საკონკურსო ქულებით პირველ ხუთეულში სამი მაღალრეიტინგული სტუდენტი თბილისის სახელმწიფო უნივერსიტეტის ფიზიკის და მათემატიკის მიმართულებების სტუდენტები არიან.
წელს პირველი ნაკადი მიიღო თსუ-ს ეკონომიკის საერთაშორისო სკოლამ, სადაც ინგლისურენოვან საბაკალავრო პროგრამაზე 53 პირველკურსელია.
ახალი სასწავლო წლისთვის მზადაა ლისის ტბის მიმდებარედ ახალი, 320-ადგილიანი საერთო საცხოვრებელიც.
სწავლის დაწყება სტუდენტებს თსუ-ის რექტორმა, გიორგი შარვაშიძემ მიულოცა.