ჩრდილოეთ კორეის სარაკეტო პროგრამასთან დაკავშირებით, გაერო-ს უშიშროების საბჭოს საგანგებო სხდომა გაიმართა. უშიშროების საბჭოს წევრებმა ჩრდილოეთ კორეის წინააღმდეგ დაწესებული სანქციების მკაცრად დაცვის აუცილებლობაზე ისაუბრეს. საგანგებო სხდომა აშშ-მა, სამხრეთ კორეამ და იაპონიამ მოიწვიეს.
"მოვუწოდებ ყველა ქვეყანას, განსაკუთრებით მათ, ვისაც ჩრდილოეთ კორეასთან ახლო სავაჭრო კავშირები აქვს, ბოლომდე განახორციელეთ სანქციების პირობები" - განაცხადა გაერო-ში ბრიტანეთის მუდმივმა წარმომადგენელმა მეთიუ რაიკროფტმა.
გაერო-ში საფრანგეთის მუდმივმა წარმომადგენელმა ფრანსუა დელატრმა, თავის მხრივ, აღნიშნა, რომ უშიშროების საბჭოს წევრებმა სანქციების განხორციელებისას სიმკაცრე უნდა გამოიჩინოს, რათა ჩრდილოეთ კორეის ხელისუფლებამ გაიგოს, რომ მისის პროვოკაციები და კონფრონტაცია უგუნური საქციელია.
15 სექტემბრის დილას, ჩრდილოეთ კორეამ მორიგი ბალისტიკური რაკეტა გაუშვა, რომელმაც იაპონიის კუნძულ ჰოკაიდოს გადაუფრინა და წყნარ ოკეანეში ჩავარდა.