პენსიების ზრდა, ბიუროკრატიული ხარჯების შემცირება, საბიუჯეტო სახსრების არასწორი განაწილება, ნეპოტიზმი - ეს ძირითადი თემები იყო, საპარლამენტო უმცირესობის სხდომაზე, სადაც 2017 წლის სახელმწიფო ბიუჯეტის 6 თვის შესრულების ანგარიშის განხილვა მიმდინარეობდა,
დეპუტატებმა შეკითხვები დასვეს. უმცირესობის წევრების თქმით, სამთავრობო გუნდი არასწორ ეკონომიკურ პოლიტიკას ატარებს, რაც ქვეყნის კეთილდღეობაზე უარყოფითად აისახება.
ოპოზიციამ ასევე პროტესტი გამოთქვა იმასთან დაკავშირებით, რომ ორი კვარტლის ბიუჯეტის შესრულების ანგარიშის წარსადგენად პარლამენტში ფინანსთა მინისტრი არ მივიდა და დიმიტრი ქუმსიშვილი საკანონმდებლო ორგანოსადმი უპატივცემულობაში დაადანაშაულა.
უმცირესობის სხდომის დასრულების შემდეგ, გიორგი კაკაურიძემ დარგობრივი ეკონომიკისა და ეკონომიკური პოლიტიკის კომიტეტის სხდომაზე გადაინაცვლა, სადაც ბიუჯეტის 6 თვის შესრულების ანგარიშით უკვე უმრავლესობისა და უმცირესობის წინაშე წარდგა.
ქართული ოცნების დეპუტატი ლევან კობერიძე დაინტერესდა, რატომ დაფინანსდა ბიუჯეტიდან “ჯემ ფესტის” პროექტი.