საარჩევნო სიებში ქალთა კვოტირების განსაზღვრის საკითხს პარლამენტის თვითმმართველობის კომიტეტმა პრინციპების დონეზე მხარი დაუჭირა.
სხდომაზე, „ქალთა, პოლიტიკაში მონაწილეობის სამუშაო ჯგუფის“ მიერ მომზადებული საკანონმდებლო ინიციატივა განიხილეს.
დეპუტატთა ნაწილმა ქალთა კვოტირების საკითხს მხარი დაუჭირა, მეორე ნაწილი კი, კანონმდებლობაში მსგავსი ჩანაწერის გაჩენის წინააღმდეგ წავიდა.
ცვლილებებით, ადგილობრივი და თვითმმართველობის არჩევნებში, პარტიული სიების წარდგენისას, პარტიებს უნდა დაევალოთ, სქესთა ბალანსი ისე დაიცვან, რომ პარტიულ სიაში ყოველი მეორე განსხვავებული სქესის კანდიდატი წარადგინონ.
წინააღმდეგ შემთხვევაში, ცენტრალური საარჩევნო კომისია პარტიებს ხარვეზების აღმოსაფხვრელად სიას უკან დაუბრუნებს, ხარვეზის აღმოუფხვრელობის შემთხვევაში კი, პარტია რეგისტრაციას ვერ გაივლის.