თურქეთში, საქართველოს მოქალაქე მოკლეს. ადგილობრივი მედიის ცნობით, ანტალიის რეგიონში 51 წლის ქალბატონს ქუჩაში ცივი იარაღით ექვსი ჭრილობა მიაყენეს.
ის სასწრაფო სამედიცინო დახმარების ავტომობილში, ჰოსპიტალში გადაყვანის დროს გარდაიცვალა.
ადგილობრივმა პოლიციამ ეჭვმიტანილის სტატუსით 44 წლის თურქი მამაკაცი უკვე დააკავა. ქუჩაზე დამონტაჟებული სათვალთვალო კამერების ვიდეოჩანაწერის გაშიფვრის შემდეგ, პოლიციამ მამაკაცი ანტალიის რეგიონში აიყვანა.
თურქეთში საქართველოს საელჩოსა და ანტალიის პოლიციის წარმომადგენელს შორის უკვე შედგა კომუნიკაცია. ქართულ მხარეს დაუდასტურეს საქართველოს მოქალაქის გარდაცვალების ფაქტი, ასევე, ინფორმაცია დანაშაულში ეჭვმიტანილის დაკავების შესახებ.
გამოძიებას თურქული მხარე აწარმოებს. დანიშნულია შესაბამისი ექსპერტიზები. გარდაცვლილის ოჯახს მომხდართან დაკავშირებით უკვე ეცნობა.