გერმანიის ფედერალურმა მთავრობამ ანკარასთვის იარაღის მიწოდების შეთანხმებების უმეტესობა შეაჩერა. ამის შესახებ გერმანიის საგარეო საქმეთა მინისტრმა ზიგმარ გაბრიელმა ბერლინში გერმანულ მედიასთან განაცხადა.
„ჩვენ მოლოდინის რეჟიმში გადავიყვანეთ ყველა მსხვილი განაცხადი, რომლითაც თურქეთმა მოგვმართა, საუბარია საკმაოდ დიდ რაოდენობაზე“, - განაცხადა გერმანიის მთავარმა დიპლომატმა.
ამავე დროს, გაბრიელმა აღნიშნა, რომ გერმანიამ ყველაფერი უნდა გააკეთოს, რათა ვითარების ესკალაცია არ დაუშვას. მისი თქმით, დიპლომატიური ურთიერთობების გაწყვეტა ან ნატო-დან ანკარას გარიცხვის მოთხოვნა თურქეთში პატიმრობაში მყოფი გერმანიის მოქალაქეების გათავისუფლებას ვერ დააჩქარებს.
როგორც „დოიჩე ველე“ წერს, საერთაშორისო შეთანხმებების ფარგლებში გერმანიას თურქეთში შეიარაღების ექსპორტი არ შეუჩერებია. ამას გარდა, გერმანიას თურქეთთან ნატო-ს ფარგლებში ვალდებულებები აკავშირებს.
2017 წლის დასაწყისიდან გერმანიის მთავრობამ თურქეთში 25 მილიონი ევროს ღირებულების თავდაცვითი დანიშნულების პროდუქციის ექსპორტი დაამტკიცა.