უკრაინულმა მხარემ კითხვაზე, რჩებოდა თუ არა ძალაში მიხეილ სააკაშვილი ექსტრადირების მოთხოვნა, ქართული მხარისგან დადებითი პასუხი, - ამის შესახებ საქართველოს იუსტიციის მინისტრმა თეა წულუკიანმა მთავრობის სხდომის დასრულების შემდეგ განუცხადა.

როგორც თეა წულუკიანმა აღნიშნა, უკრაინაში მიხეილ სააკაშვილთან დაკავშირებით სამართლებრივი პროცედურები მიმდინარეობს.

"უკრაინულმა მხარემ მოგვმართა წერილით, სადაც დასვა შეკითხვა, რომ ის 2014-2015 წლების ექსტრადირების მოთხოვნები, რომელიც მათ მიიღეს თავის დროზე, იყო თუ არა დღეს ძალაში, რაზეც პასუხი მიიღო პროკურატურისგან, დიახ, ის მოთხოვნები არის დღესაც ძალაში. კიდევ ერთხელ თავის დაზღვევის მიზნით, გადაიგზავნა იგივე დოკუმენტები, რაც ადრე იყო გაგზავნილი. შესაბამისად, უკრაინულ მხარეს აქვს მოთხოვნა განახლებული. რაკი ჩვენგან შეიტყვეს, რომ სამართლებრივი ინტერესი კვლავ ძალაშია, უკრაინაში მიმდინარეობს სამართლებრივი პროცედურები", - განაცხადა თეა წულუკიანმა.

მისივე თქმით, საუბარი იმაზე, რომ ექსტრადირების მოთხოვნას პოლიტიკური საფუძველი აქვს, არ შეესაბამება სიმართლეს.

"ბევრჯერ მითქვამს, რომ პოლიტიკოსობა არ არის იმუნიტეტი და თუკი რომელიმე მთავრობის წარმომადგენელი ჩადის ისეთ ფაქტებს, რომელიც შეიძლება დაკვალიფიცირდეს როგორც დანაშაული, ვინც არ უნდა იყოს, ჩვენი მთავრობის წარმომადგენელი იქნება, თუ წინა ხელისუფლების, ყველამ უნდა აგოს პასუხი კანონის წინაშე", - განაცხადა წულუკიანმა.

წულუკიანი იზიარებს სოზარ სუბარის აზრს იმასთან დაკავშირებით, რომ კარგი იქნება, სააკაშვილი თავად დაესწროს მის სასამართლო პროცესებს.

"ეს არ არის მხოლოდ სოზარ სუბარის აზრი, არსებობს ჩანაწერი ადამიანის უფლებათა დაცვის კონვენციის მე-6 მუხლის მე3 პუნქტის ქვეპუნქტებისა, რომელიც ამბობს, რომ ბრალდებულმა იმისთვის, რომ სრულად განახორციელოს სამართლიანი სასამართლოს უფლებიდან გამომდინარე მისი უფლებები, ჩვენოს, რომ ის მართალია, კარგია, რომ ის არის სასამართლოს დარბაზში", - განაცხადა წულუკიანმა.